Samaa abʊmbɔnɔ ɖǝn a wala. Baa mpá mpaŋa njɩ kǝbɛrɛ ba kim asǝla na Yeesu. Ŋkǝŋ na a kɛɛshɩɩ galei gaɖǝn alǝ ashee pɩ wàà : « Afʊmɩ ɖǝn a ce atɩ ram ʼɩpi.

A ɖa na ram ma, ɩɖǝn ɩ fǝɖa ʊnyɩŋca laŋ. Bɛrɛ ba fǝl na nyɩ. Bʊsapɩ́ gboo bʊ sɔm ɩ.

Ɩɖǝn ɩ fǝɖa atakǝwa nɩ. Ɩ ta ma, naa acii, aɖʊwaa kʼɩ na ŋǝ bʊto na.

Ɩɖǝn ɩ fǝɖa ɩyɩwǝ nɩ. Nʼɩ man ata kpaarɩ, nʼɩyɩwǝ ɩ cǝwa ɩ.

Ɩɖǝn ɩ fǝɖa gatǝna gasoŋsono laŋ. Nʼɩ ta naa aŋʊm ɩpi : Gɩpi baa gɩpaŋa jɩ gɩ shee ɩpi ɩshɩnʊn (100). »

Na Yeesu a pele nʼʊwǝlǝ ʊkaŋkra wàà : « Arɛ̀ɩ a wʊɖa atɔ na rǝŋǝ ma, a rǝ̂ŋǝ ! »
Na Yeesu abakǝŋja ba taba nɩ wàà : « Gakɛɛshɩlei ŋgaɖe, kaashɩ a jɩ ka wàà, baɩ ? »

Na Yeesu a lǝ pɩ wàà : « Gaja ga shee anyɩn ɩ yɔ Gaja kaayarɩtǝna kɩɩja nɖee ɩ foro ma, ama ga shee basaaka bʊkɛɛshɩlei bʊ, naa "ba ta naa kîɖe, ba pàá ŋǝ̂ na, ba ta naa rǝ̂ŋǝ, ba pàá tɩ̂ kaashɩ na".

Gakɛɛshɩlei gaɖe kaashɩ na gǝŋ wàà : Ɩpi ɩ lee Gaja kaalei jɩ.

Ʊnyɩŋca ɖe na gǝŋ, bɛrɛ mbaɖee ba na rǝŋǝ ma. Kaŋkǝm Sheetaanɩ aɖe kpa alaa galei gaɖe bɩcine nɩ, naa ba pàá tɩ́ câm jɩ aŋǝ ʊfʊrʊ na.

Atakǝwa ɖe nɩ gǝŋ, bɛrɛ mbaɖee ba na rǝŋǝ galei naa acam jɩ nʼʊciŋ­kǝrka ma, ama kǝ ba na pala galei ga wʊ̂ɖa ɩlǝlǝmǝ na. Tam ɖǝn nɩ baɖe ba shee jɩ ɩjá, ama ba ta tɩ́ wʊ̂ɖa ɩnawɩya, baɖe ba pâla jɩ.

Ɩpi nɖee ɩ fǝɖa ɩyɩwǝ nɩ ma, ɩ tɩ faŋa bɛrɛ mbaɖee ba rǝŋǝ galei ma, ama kʼaa sǝra ga kpǝ̂r naa aŋʊm ɩpi na, aɖʊwaa amaana, afaŋa, nʼayejɩka ɩ tɩ naashɩɩ galei gaɖe.

Ɩpi nɖee ɩ fǝɖa gatǝna gasoŋsono nɩ ma, ɩ tɩ faŋa bɛrɛ mbaɖee ba na rǝŋǝ galei naa atoŋo jɩ bɩcine ɩsoŋsono nɩ gɩshɛbʊ ma, baɖe ba tɩ ŋʊm ɩpi na ce na ce. »

Lʊkaasɩ 8, 4-15

Texte anii : © 2019 LINGO-Bénin,
tous droits réservés pour tous pays
Pour toute utilisation hors de ce livre, contactez-nous dʼabord.

Téléphone et WhatsApp (+229) 62 58 04 49

info@lingo-benin.org