Tsuwa ka ikyagh ki jiir iue amin. Ka vea lu nongu yô, i yila er atsuwa. Ngise la Tiv eren gbaiyol a atsuwa a nyaa tseer. Genger hembe doon shin tsuwa u nyaa.

Kucha ka ikyagh ki haan zar kwaghman shin mi. Mngeren, iber man msôrom cii ka i haa shin kucha. Ka i a lu imôngu yô, i yila er ikyucha. Iber amine hembe nyohon shin kucha.

Wanyekwaor man gumkwase ne mba man iberagase shin kucha. Saan ve iyol kpishi er ve kpaa ve lu umbur aeren a uter asev nahan.

Ludel, iyongo man kpaakpa ka ikyav mbi wasen kpishi. Aluer ior tema kwaghyan imongu yô ka ve kesen hen kwese sha ludel. Iyongu ka i too zar kwagh u garen shin mi. Kpaakpa yô ka i kember luam shin tye a min.

Ishegh, akem man gbande ka vea lu kpishi yô i yila er, asegh, mbaakem man agbande. Ishegh ka i koso zar man isham kwagh keregh. Akem yô ka i kôr sha dungwa na la i kese mngerem shin msôrom amin. Ka i ta iue shin gbande.

Ijôndugh ka ikyagh ki gberen luam shin min. Ka ma a lu nongu yô i yila er, mzôndum. Ka a gber luam hen ijôndu a wa hen ityegh ki hen kpechie yô a tsee baveraa, a ndôhôr ga cii.

Lu man tor kua ikyese ban ken tar wase ga cii. Ka i dugh luam i has hen ikyese zum u a ngee kpishi yô. I gema i haa shin lu man i kume. Ka kasev mba taver iyol man mbayevikyaior ve kum luam u lun a asôndo ga ye.

Korugh ku a iwasen kpishi. Ka i kile ku tsembelee i maan msôrom a min. Ka i ongul ian hen imbusu kor nahan ku hingir kwagh u tôngun lôhôn ior mtem kpaa. Mbakpehen ishor kpaa ka ve lu a a min sha u nengen mngerem.

Nase, answa man kwembe ka ikyav mbi wuan ilyôghnuv a min. Mba dughun inase man anshwaan pe avande a lu yô. Ikwembe yô ka i dugh i shin waarawa u shin ifi. Ka a wua mkem man nune sha nase yô i kura sha kwembe i haa shin tsuwa.

Ityegh (Shawa) ka ikyagh ki haan mngerem ma man. Ishawa ka i ndôhôr mngerem kundu kundu. Ka i kese mngerem shin shawa, sha akem i haa shin kucha i ma imyura.

Or Tiv ka a kaha sule a dugh iyough kpishi, shi a haa isham akaa ken aba. Iba shwa ka i yuwha kpen kpen. Iyough ka homon kwaghyan u Tiv. Ka i ngbagh, i jiir, shin i kaa sha mkure kpaa. Iyough sha shwa ka ki nyôr mngerem doo doo.

Kasev kua mbayev ka vea ya kwaghyan yô ve hingir sar sar. Ortom kaa er, "Ka ki ken min ki eren ki ken won ye." Inja na yô, or ka nan ya kwaghyan ve nan zua a agee a eren tom kpaa ye.