Kyegh Sha Shwa (KSS) ka iniongu i he ken Tar Tiv. Ka mzough u civir akombo ga. Ka u kwaghAôndo shin mbapativ kpaa ga. Ka u nderen aeren a tyôô a ken tar Tiv.

Fada u vesen ken tar wase, Solomon Mfa Ukeyima, Tor Kyegh Sha Shwa (KSS) due a mhen ne sha u zuan onov Tiv sha ciu mzehemen u tar Tiv cii.

Or-Tiv ôr injakwagh er, "Ka ityem imongo Mbagbera ve fe iwa ye." Inja na yô, mzough man mtem u dedoo ka a va a mzehemen. Imo i yilan mzough ne ka, "Ayatutu ka unô? Ka se!"

Ka i umbur aeren a Tiv sha iniongu ne. Hanmô kwaghyan, amar man akondo a tyôô cii ka a due tembe.

Akaa a nan msaaniyol kposo kposo nga a due tembe. Ajigbee kpa ka a due tembe.

Sha iyange la ka u nenge a ikyav mbu yan kwaghyan mbi uter asev mbi Batur a ne se hungur a min cica cii. Ikyucha, asegh, mbaakem, mzôndom man agbande a nyatyuu, man ludel kpaa.

Homun kwaghyan hen iniongu ne ka Luamkumen man Kyegh Sha Shwa. Shwa ka kwaghyan u Tiv jughlii. Ka i wua, i jiir iue amin. Shi ka i kaa i wua a wua, i ya yough amin kpaa.

Or-Tiv ye kwaghyan tswen ga. Torshagu Akeranya Or-Tômbo Mbalagh kaa er, "Luam ka iyar, i doon burun tswen ga." Tiv ka ve kase ihwa I kwaghyan, hanmô or nan coon gbem a kar been shin ijôndo.

Gesa u ônkasev mba doon-ashe man shi lun a inja u i her er Kumashe u Tiv la kpaa ka i er un. Ka i cir wankwase u hemban la idyer I Torkwase.

Iniongu ne ngi van a mzough man dooshima kua mzehemen ken tar wase u Tiv kpishi.

Ken hemen yô, atôatiev kpaa vea gema duen ajiir agen sha tar cii u va ember iniongu ne. I a bugh ior kpishi igbenda i eren kasua man kuren ugbaiyol vev kpaa.

Iniongu i Kyegh Sha Shwa (KSS) i gba ken uer u Oktoba ayange 26 man 27 hanmô inyom.