Mpša o be a e kwa tlala gomme a nagana go hwetša dijo tše monate kudu. O fihlile nokeng gomme a thoma go lokiša dilo tša gagwe tša go thea dihlapi. O rile ge a re, a bona Kwena a tšwelela a e tšwa ka meetseng.

Mpša, ka go befelwa, a re "Lebelela mo o yago gona wena wa mokokotlo wa letlapa". Kwena a re o bula molomo gore a tšhošetše Mpša, Mpša a re "Aowa hle! Tswalela molomo wa gago wa go nkga rena re nyaka go hema." Kwena a bolela a re "Bona mo wena raditšhila, o swanetše gore o hwetše lefelo le lengwe la go thea dihlapi. Mpša a tšea dilo tša gagwe a sepela.

Tseleng ya gagwe ge a sepela, Mpša a bona mae. O rile go bona mae, a nagana gore a ka tšea mae a ya go apea, ka ge le hlapi e tee a se a e swara. Teng ya gagwe e be o kare go na le motho yo a e bethilego ka mokgwa wo e be e lla ka gona ka tlala.

"Nto ela ya mokokotlo wa letlapa ya go sepela bjalo ka pidipidi e nagana gore e ka tšea monyetla waka wa go hwetša dijo, mara nna kea tseba gore modimo yo mogolo wa dimpša o hlokomela dimpša tša go loka bjalo ka nna", Mpša o be a bolela tše ka moka a ntše a hlatša mokotla wa gagwe ka mae.

Mpša o fihlile gae a gotša mollo. A bea pitša godimo ga mollo gomme a bea mae a le kgaoswi le mollo. Mpša o be a le ditorong, a nagana ka mehutahuta yeo a ka apeang mae ka wona. O be a nagana gore o tla apea mae ka moka gomme a ja amang lehono a ba a bea amang gore a je gosasa.

Kwena o rile go lemoga gore mae a gagwe a timetši, a latela mohlala wa phoofolo yeo e utswitšego mae a gagwe. O fihlile gae ga Nkwe gomme a mmotšiša ka mae a gagwe. Nkwe o rile yena ga a tsebe selo ka mae. Nkwe o eleditše Kwena gore a hlole Mpša ka ge ba e na le mehlala ya go swana.

Selo sa go makatša e be se direga marago kua gae ga Mpša. Ka ge Mpša a beile mae kgaoswi le mollo, a thomile go phaphaša ebile bana e be ba kitima ka ntlong ya Mpša. Mpša o tla makala kudu ge a hwetša gore mae ga a sale gona. Mpša bjale o be a fitile ke monyetla wa gagwe wa go ja dijo.

Mpša o rile go bowa, a hwetša gore mae a le a phaphašitše. O be a nyamile kudu. Go nyama ga gagwe go mo dirile gore a nagane go yo lahla bana ba. Mara a tlela ke mogopolo o mongwe. A tlela ke mogopolo wa gore o tla godiša bana ba kwena gomme a dira gore ba hloye mma wa bona. Mogopolo wo o be o mo thabiša.

"Wena hlogo thata", Mpša a kwa lentšu le bolela. "Kea tseba gore o gona. Ke kgona go nkgelela bobe bja gago. Mphe mae a ka gomme kea go tshepiša gore ke tla go bolaya ka ponyo ya leihlo", gwa re yalo Kwena. "Tloga mo gae gaka wena se metša maswika. A kena nako ya meno a gago a go hlahlagana nna", gwa fetola Mpša.

Kwena o kgonne go tsena ka gare ga ntlo ya Mpša a hwetša Mpša a e fa bana ba gagwe dijo. Go tsena ga Kwena ka ntlong go ile gwa tšhoša Mpša. O rile a re o a tšhaba, ke ge Kwena a mmetha maragwana a ka mosela wa gagwe. "Iyo! Ba mpethile ka mosela wa letlapa. Iyo!", gwa lla Mpša.

Mpša ne a nagana gore o phonyogile go fihlela a bona Kwena a mo šetše ka morago. Mpša a goelela a re "Ke kgopela o seke wa nkitimiša hle wena makgolo wa mekgaditswane. Ke be ke sa tsebe gore bana bale ke ba gago kage e le ba ba botse ba sa swane le wena. O se ke wa kwata gobane ke sereto, go bana ba gago"

Kwena o tšwetše pele ka go kitimiša Mpša go fihlela moo Mpša a felelago ke maatla. Ke ge Mpša a tlela ke mogopolo wa gore a fediše dilo tše ka go emiša Kwena gomme a kgopele tshwarelo. Mpša a bolediša Kwena a re "Bona, ke kgopela tshwarelo go tšea mae a gago. Ke be ke nagana gore ke a nonyane ela ya molala wa thutla mara ga e kgone go fofa". Kwena o ile a swarela Mpša kage a ile a mmetha maragonyana a.

Bobedi ba bona, ba boetše morago go tšea bana ba Kwena. Ge ba fihla nokeng, Mpša o dutši ka thoko ga noka ge Kwena le bana ba gagwe ba tsena ka meetseng. E rile ge ba fetša go tsena ka meetseng, Mpša a goelela are "Ga bose, bana. Le seke la swana le mmago lena la lebala go hlapa meno". Kwena o ile a ngongorega gomme Mpša a tšhaba.