Kgalekgale go be go na le mokgekolo yo a bego a dula le batlogolo ba gagwe ba bararo.

Mesong ye mengwe le ye mengwe ba be ba eya go šoma mašemong.

Ka letšatši le lengwe, yo mongwe wa basetsana a re, "Koko, ga ke ikwe gabotse lehono."

Mokgekolo o ile a mo romela gae.

Ge mosetsana a fihla gae, a bona nama ka pitšeng.

O jele nama yela ka moka gomme a re go fetša a yo robala.

Mokgekolo le bana ba babedi ba be ba lapile ebile ba swerwe ke tlala ge ba fihla gae go tšwa mašemong.

Koko a apea bogobe gore ba tle ba šebe ka nama yeo a bego a e apeile mesong.

O butše dipitša gore a solele batlogolo ba gagwe.

O rile ge a bula pitša ya nama, a hwetša e se na selo!

"Ke mang yo a jelego nama?" gwa botšiša koko a sentše sefahlego.

Batlogolo ba šikinya dihlogo ka boraro ga bona. "Ga se nna," ba realo ka o tee ka o tee.

Ka moka ba šikinya dihlogo ba gana ba re a se bona.

Koko wa bona a tlema thapo a e tshediša noka.

A ba laela gore yo mongwe le yo mongwe a sepele godimo ga thapo yela a opela koša.

"Yo a llego nama o tla wela ka nokeng, gore a ithute go bolela nnete," Koko a ba laya.

Motlogolo wa mathomo wa mosetsana a sepela godimo ga thapo a tshela noka.

Koša e be e opelwa ka tsela ye: "Nimbe esia ulire inyama. Mukoye khalira engwe mu nyanza. Mukoye khalira engwe mu nyanza."

Batlogolo ba bangwe ba babedi ba thoma go ngangišana.

Mosetsana a re go mošemane, "Go ya wena pele." Mošemane a araba, "Aowa, go ya wena!"

Motlogolo yola a jelego nama o be a tšhohile a bile a thothomela. O rile ge a batamela thapo gore a e namele, a thelela a wela ka nokeng.

Thušang! Thušang! Gwa goeletša mosetsana. Koko a re go batlogolo ba babedi, "O na le molato, fela re swanetše go mo thuša."

Ba ile ba thušana go goga mosetsana yo a bego a tšhogile go mo ntšha ka nokeng.

Go tloga lona letšatšing leo, batlogolo ba mokgekolo ba bolela nnete.