Eira inho, ku kyalo Namulesa, kwaliku omusaadha nga eriina lye ni Tawubwa. Tawubwa nga ti mugezi muzibu! Omusaadha ono yali muleeyiriri nga yakula mu nkula ye yonka kyoka nga enda ye nga ni bw'alya emmere tevaayo!

Okulya nga talya asuulayo ibiri. Nga ghazira kya kulya kyawubira.

Ekiseera kyatuuka, endhala yaagwa ku kyalo ekya Namulesa. Abantu bangi baadaaga n'endhala eno naamakenkere. Endhala yaluma abantu abakulu baawera mu luwu, abaana abato baniala oti butooke bugomba n'abandi baafa bwe fo.

Abantu bwe baabona nga endhala namakenkere ebasobeire, baayeta olwekobaano baghange okufuna amagezi aganabawonia namakenkere.

Tawubwa bwe yasituka okwogera, yaakoba ati, "bana mumpeeyo akaseera ngyeku ghe ndya, ndhidha kwira mbakobere." Olwavaagho, Tawubwa yaigukira mu kibira kye baayetanga mabira.

Mu kibira kino Tawubwa mwe yayagaana ekikulekule ky'omusaadha eyakula mu nsambo Tawubwa ye yali nga yakulamu nga n'emmere yeyalyanga ku bantu baagigabanangamu n'omusaadha ono.

Omusaadha ono yali wa munhwa mumyuufu nga alimu amaino amaghanvu asatu agaakula oti ga naikula eyakula naakya, enhindo ye nga erimu ebituli aye buli lwaisa omuuka ghaalingiriiza omunhwa obusubi buvuluka.

Tawubwa bwe yamulamusa, omusaadha tiyamwiramu. Tawubwa yeena tiyamufaaku yeeyongera mumaiso mu kibira, mu kibira mundha yeyayagaana buli kika kya mmere eya buli nsambo: entuntunu, obughama, amasooma, amaluulu, epwapulo, amapaapaali, amaliibwa n'ebindi bityo.

Tawubwa yaasanhuka yaseka olw'eisanhu e lingi. Yatandiikirawo okunoga ku buli kibala kye yasobola yeetwika yaatuusa ekitereke ye baine beyaleka nga bafotookereire olwe ndhala.

Bwe yatuuka baakuba emizira baasanhuka, baamwaniriza era baamukangaalusayo. Yaabakobera byonabyona. Yaabaghayira n'omusadha ow'amaino asatu ate ng'alaya abantu. Yaakungania baine abo ku kyalo era yaabagha n'amagezi okwefaaku.