Agho olwatuuka, ghabaagho omusaadha gwe bayetanga Wandhovu ni mukagwa we Wakayima. Omucaala gha wandhovu nga ni Nandhovu, kabiri ogha wakayima nga ni Nakayima. Buli Musaadha yagonzaganianga n'omucaala ghe bubi inho ng'oghanga okukoba oti balizikibwa mu kiina kirala nkani itaka n'eriribawula, ng'owundi talya kintu kyona kyona natabikiraku mwine.

Wandhovu nga bwagula ekipande eky'olugoye atunzaaku empale, n'esaati ye, yalekereragho ni mukazi ghe yaatunzaamu egomasi n'akatambaala ok'okumutwe. Me niini baana oti baana basomi mu yinifoomu, era nga bwebaba baja mu nimiro olw'eigulo, ababonera aghala baadhuubanga bati abasomi balikwira, babasiibwire kwisomero. Atyo wandhovu bwe yalaganga mukenkede ghe omukago ogw'ekimonte.

Wakayima kabiri yalaganga bwene bwene mu nsambo yendhawulo. Mwene yali ng'amusombera emale n'ensonzi buli lunaku era nga azira biseera bija kulima, awuuna pwi pwi kuja ku mwiga kuloba mmale na nsonzi. Era kasita nga ayambala bikwempe, aba awondera ku mwiga, nga naidhi entanko n'ebyole ye byaganibwa. Omusaadha waitu ono ngaidhula eitosi me yafumuuka, kabiri yasiwuuka oti amaze myaka na myaka nga taidhi kalaayi yeeri.

Wandhovu ni wakayima, omukago gwaibwe gwali nga gubasaza mu nswa endala, ole yagaayaaka ekikina, n'owundi yamira ekyeitale. Nakayima ni Nandhovu boona baali oti isonko naikovu, oba ghobonera ekinu n'omukonko, ole ghaaba n'owundi gh'omwagaana, ghabita kabiri noole atyo! Kale ng'emisambo ekoba eti babiri babiri kya nswa.

Lwali lulala, Wakayima nga bwe yakolanga buliidho, yanaabaku yaaja ye mukagwa ghe okumulamusanamuuku n'okukuba emboozi.
Wandhovu olwatemya ku wakayima ekimodi, yaleeta eikonero, mwine yaatyamaku. Olwomala okulamusangania, wandhovu tiyalinda mwine na kumira matanta, ang'amukoba okumutwala ku eifo mu nimiroye. Wandhovu yali yalima ebidhandaali ng'aye takoberangaku mukagwagho. Kyoka byali byabala inho ng'odhuuba okukoba oti biri kumubikabubike!

Entangama ntonioli ng'ebiseegho, Wandhovu yakoba mwine bairayo mangu mumaka gaibwe aghazira kumughaaku bidhandhaali ebyali ebyanhuluguka.
Wakayima yairayo nga yemuluguunia mu mwoyo gwe. Nga wabiseegho entangama mpa gheyaga, wakayima yairayo mu nimiro ya wandhovu kwigha bidhandhaali bwakoba ati ekiwunha kyereetera ekikirya. Kyoka yabitwalira Nakayima alyeku ayege okulima.

Nandhovu yeena bwe yali egha Nakayima yaiba emale n'ensozi yaatwalireku Wandhovu ayege okulobanga emale n'ensonzi. Buli muntu bwe yazuula okwibibwa yaaja egha mwine yamukubirira enduulu. Ekyavaamu Wandhovu kuloba Nandhovu kuba mwibi yaaja ni Nakayima, Wakayima yeena yewangulira Nandhovu.