Awo olwatuuka, ghaaliyo omusaadha omughafu einho aye nga ali no omukazi omulungi einho oti itungulu.

Omusaadha ono ye bayetanga Mwavu, yali n a amaka ge kumpi n'olubiri lwa Kyabazinga Mulawa.

Lwali lulala, abasaadha ba Kyabazinga baatambulatambulamu okumanha ebifa mu lubiri ni kumpi nalwo. Bwe baali bakaatambula baayagaana omukazi omulungi omunhugulufu.

Baatya inho olw'okuba omukazi afaanana atyo ateekwa kuba mu lubiri era nga muka Kyabazinga. Olwamubuuza yaaviira yaabairamu ati, "Nviira gha Mwavu era ndi mukaziwe."

Bairayo baakobera Kyabazinga ebifiire mu lugendo lwaibwe era baamuloodhera n'ebigema ku mukazi omulungi einho ye baayagaine ate nga muka musaadha wundi atali kyabazinga ono.

Ekyo kyakuba kyabazinga ghala inho, era yaalagira baleete omukazi oyo ni iba, Mwavu.

Olwabaleeta mu lubiri, Kyabazinga yaasalira Mwavu gwa kufa olw'okuba yali n'omukazi omulungi atyo asinga ababe. Mwavu bwe yeewozaaku, kyabazinga yaakoba ati aghazira ekyo aidha kwita mukazi.

Mwavu yaakoba ati, "Kale kibe kityo nga kyabazinga bw'okobye aye bamale bampe omulambo gwa mukazi ghange."

Kyabazinga yaalagira baita omukazi muka Mwavu era baagha iba omulambo yaaja nagwo.

Omusaadha ono Mwavu yaaja nga alira bwa gegenga olwa mukazighe omulungi atyo okwitibwa mu maani ghagati.

Bwe bwatuuka obwire nga buli kumpi kukya, Mwavu yabbeedha omulambo gwa mukazighe yaagutwala mu luguudo emotoka mwe dhibita yaagukiika mu luguudo, yaira mu nsiko kumpi agho, yeekweka.

Ghaabita akaseera mpa ghekaaga, bbaasi yaidha nga ebita mu luguudo olwo era omuvuzi waayo yeekanga inho. Yaasibira ku mulambo aye tiyaguniinaku.

Awo Mwavu yaava mu nsiko magu inho yaakuba empungu eno bwalira ati, "Mukazi wange bbaasi emubanze yaamwita."

Omuvuzi wa bbaasi n'abasaabaze, baamwegairira abasonighe aye yaaloba nga akoba ayenda mukazighe nga mulamu nga bwabaire. Aba bbaasi baayongera okumwegairira aye byabasobera.

Olumaliira, yaakoba ati aidha kubasonigha singa wakiri bamugha bbaasi beene batambule baje era awo ghaidha kuba nga ezira abandha mwine kintu kyonakyona. Aba bbaasi baikiriza baagimugha baalumuka na bulumuke okuvaawo olw'okutya. Mwavu yaaja ni bbaasi nga yiye era yaaziika mukazighe.

Lwali era lulala, Kyabazinga yaawuliza ati eliyo omusaadha ali n'ekintu ekireeyiriri aye mbu bakityamamu abantu ghaire kamala, kyabatwaala ghe baba benze. Era yaasindiikayo abasaadhabe baje babuulirize naani mwenekyo? Era kiki ekyo? Mwavu yaakobera Kyabazinga bwe kyali era yaabuuza kyabazinga ati "gheena oyenda okugifuna?" kyabazinga yairamu ati "iyii". Mwavu yaamukoba yeena aite mukazighe gwasinga okugonza.

Kyabazinga tiyaita mukazi gwasinga kugonza aye yaita gwasembayo okugonza ku basatu, yaatwala omulambo mu luguudo obwire yaalindira mu kasiko aye obwire bwonabwona ezira motoka eyabita mu luguudo olwo kuba abantu abandi baali bakitegeireku aye nga kyabazinga taidhi. Era kyabazinga yairayo nga munhiivu inho olwa Mwavu okumusughaba.

Olwatuuka mu lubiri lwe, yaatuma abasaadhabe baje baleete Mwavu mangu inho. Yaamubuuza lwaki yamulimbye. Mwavu yamukoba ati oboneka tighaita mukazi gwosinga kugonza kyova tiyaliimu nkabi. Era yaamukoba ati ita gwosinga kugonza, bbaasi bwetaidhe onankola kyoyenda. Kyabazinga yaita omukazi owundi aye era owokubiri mu kugonzebwa tiyaita gwasinga kugonza, kuba tiyeesiga bibono bya Mwavu. Yaatwala omulambo obwire mu luguudo nga bwe yakola mu kusooka, aye abantu abandi baali bakitegeireku.

Kyabazinga olwatuuka mu lubirilwe, yaatuma abasaadhabe baje baleete Mwavu mu bwangu inho. Olwatuusa Mwavu kyabazinga tiyamwikiriza kwogera kintu kyonakyona ghaire, kuba yali amaze okumulimba. Mangu ago kyabazinga yaalagira baanaaliika Mwavu emiguwa ku mikono ni ku bigere, era baamusibaku agabaale agazito einho era kyabazinga yaalagira abasaadhabe ab'amaanhi eihno babiri baje bamusuule mu nnhandha aghali amaadhi amaghanvu einho.

Era baamuta mu kikutiya, baaja okumusuulayo mu nnhandha. Aye abasaadha bano bwe baali bali kuja ku nnhandha, baaduuba okuja okunhwamuuku era baaleka ekikutiya ekirimu Mwavu ku ngira baayawuka baje banhwemuuku meemale beyongereyo ku nnhandha.

Nga abasaadha ba kyabazinga baakanhwamuuku, ghaaliyo omusaadha yali ava ku nnhandha kunhwesa nte dhe maadhi. Omusaadha ono yali aidi Mwavu. Yaabona ekikutiya ekyenheenhya. Yaatya inho. Aye Mwavu yaayogera ati, "Totya. Ninze Mwavu." Era yaamukoba ati, "eriyo abatemu abali kutambula ku kyalo kuno. Nze n'okukoba omuntu yansiba yanta muno era abatemu naabawona."

Omusaadha omwayi yaatya inho era Mwavu yamukoba ati, "bw'oba gheena oyenda okubawona, nsimulula nze nkusibe nkute muno tibaidha kukubona." Omwayi ono yaasibula Mwavu, era Mwavu yaamusiba yaaja n'ente dh'omwayi ono mbu adhimukuumirenga.

Ghaabitawo akaseera kaneneku, abasaadha ba Kyabazinga baali bali kutambulatambula nga bwe baateranga okukola, baayagaana Mwavu n'ente enhingi einho. Baasooka kumulumuka kuba baali baidhi bati baagaine muzimugwe kuba beene mu bwongo bwaibwe baali baidhi bati Mwavu yasuulibwa mu nnhandha nte era yafa ira. Aye Mwavu yaabeeta era yaabakoba ati, "mutalumuka, era mutantya, kuba nze bwe mwansuula mu nnhandha nafunayo bukombe buno. Ente dhe muli kubona."

Abasaadha bano bairayo mu lubiri era baaloodheraku Kyabazinga ebibaire yebatambuliire. Kyabazinga yasooka kughakana bwe baamukobera bati Mwavu tiyafa, mulamu era mu nnhandha yafunayo bukombe. Kyabazinga yaalagira baleete Mwavu mangu inho mu lubiri.

Olwaleeta Mwavu n'ente dhe, Kyabazinga yaamubuuza lwaki tiyafiira mu nnhandha yebamusuula. Mwavu yairamu ati, "mu nnhandha yebansuula ezira kufa, aye eriyo bukombe obw'ebika kamaala era mwene nalondaku bwa kuba na nte kamaali dhityo." Yaakoba kyabazinga ati, "gheena bw'oba oyenda okudhifuna bakusibe nga bwe bansiba, baje bakusuule mu nnhandha era oidha kufuna obukombe bwonayenda bwonabwona."

Aye Kyabazinga yakoba ati, "Mwavu oyenda kundhita. Nkwidhi oli mulimba inho." Mwavu yaakoba Kyabazinga ati, "bw'oba oghakana, tuma abasaadhabo begheesiga einho baje ku nnhandha babone obanga mu nnhandha ezira bantu, era bwe baba bazirayo, awo anaanhooma kyendikukukoba." Awo Kyabazinga yaatuma abasaadha babiri beyesiga einho baaja ku nnhandha. Olwatuuka ku nnhandha, baalinga mu maadhi, baabona ebinsense byaibwe mu maadhi, aye beene baalowooza bati baboine bantu bandi mu maadhi.

Bwe baira mu lubiri, baaloodheraku Kyabazinga bye baagaine ye bagiire. Era baamukoba bati, "kituufu inho. Mu maadhi eriyo abantu beene ate bangi." Awo Kyabazinga yaikiriza baamusiba baamutwala okumusuula mu maadhi."

Baajanga bati, nga Mwavu alangirira ati, "okuva mu kiseera ekyo, mwene ni Kyabazinga. Era n'omukazi gha Kyabazinga omulungi einho oti itungulu, gwe yali agonza einho, buti wuwe. Kuba Kyabazinga ye baali bamutwaire nga taghanga kwira olubeerera. Okuva kw'olwo, Mwavu eyali omughafu einho mu kusooka, yaafuuka Kyabazinga ate omukombe einho, ekintu ekitaasuubirwa.