Arai amana ka ata najokon na Ileleba ng'imwa, ng'akima, ka emogo. Nabo niajokon noi aria ng'idison lu alemi ng'esi ekaru daang etia ni etia. Ayakar ata ng'ide a ng'ide lukaalak. Nabo ng'ikaitotoi kang, ka ayong keyeni namunonoi atamar kirai sua lukimina ng'esi. Kilimonokini sua ata kosi ng'aminonoi nadiochichik. Nabo ayei ibore ipei pe asaki ng'esi akimor ka sua: Ni etokononio ng'esi ng'idison.

Akwaar apei, eng'olikini ayong akikap na amirija iwaakinitae nakolong nikalapatan. Na eng'isia ayong atamar aka inyo, aponu katatachakin, "Arai akikap kang nakaililon." Diyete akikap ayakasi ng'akui a edis na ebelonori ng'esi akolong'it cha daang. Abu ayong ebunyakin. "Ng'aka inyo ng'akui, ata?" abu eng'is. Abu ataanyu atachakinet apei, "Erai ng'akui kang nakatalarak."

Ajok noi akitere ata, ng'idison, ng'akui a edis ka akikap na a amirija. Sodi katomia ayong ata ni aitiokang lotich. "Ata, karecha, kimiekinae ayong kete iyong isubi" Na kanenei nechamuna ng'esi ayong tani eboikin. "Kimiek akichan, ikoku, tosub kona kilimokinere," abu tobong'ok. Atorotok ayong akeri.

Na abong'unio ayong, eboi ata anikalapatan na kaneni amam akikap kori ng'idison. "Ata, nyani akikap, nyalu ng'idison daang, nabo nyani." Sodi atachakinet na abu ayong ataayu, "Eya nikang nikaililon." Arai na nyikitalarete.

Adaunet a ng'irwa a ng'iarei, abu ata katomia ayong ayaun aburo keng nakichogaet anakai anakeng anaeperionio. Kaatipei na ang'aaria ayong ekidor, abu eurun naajokon ang'idison alukakonok kepeyou ayong. Tooma akai na alotooma, ayei akikap na amirija nakaililon idaitae a eburang'it. Abu ayong ekeu ng'esi sodi eng'u niasegan.

Abu etoil ata keteriang'ak ayong na anyarar, "Nyo isubi iyong? Kiburburak kiun aburo." Eburburak ayong ka aburo keng. "Nyo kitamaisani iyong?" King'is ata. Abu aking'iset keng keteyen ayong atamar aroko ayong amaisani na aanyunia nikaililon keng.

Akwaar nache na abunio ata akilakin itiokang, atamatar ayong nakai keng akichok ng'idison apei nabo. Ayei ateni a ng'idison lu akonito noi. Abu atorut epei sodi edaik loworu kang. Na arumoria akimuk akikap nabo, abu atamana yaye akai sodi atanyam. Arai edis lokaabon lo idwang'it daang.

Akwaar nache, na ayakar ata namana egeri eboka, abu ayong atololoea tooma atoripak ng'idison. Kepotu lukaalak kech tokoko. Pe apedori aking'arakin alemar atene ang'womon. A ekibuny kang abu kemuriak akibur akikap.

Apak nache ebong ng'ina nakanyaritor ayong ito, apa ka ata, ayeni ayong kotere nyo. Awaret ng'ina ani enapakin ayong, ayeni ayong atamar pe apedori ayong akoko nabo, mere ani ataakang, mere alokauriak kang'a anibocha nabo, mere tani anitwaan aniche kang'ini.