Omu biro byaira muno hakaba haroho omusaija omugara. Yagonzaga kulya kurungi hamu nokujwaara kurungi agende kucakara aleke kwiraguza engaro ze. Habwokuba akaba ali mwecumi abaisiki bamugonzaga muno.

Nahabweki yatunga omwisiki murungi muno baatandika kuzaara abaana. Abaana obubahikire nka bataanu buli omu yatandika kumusaba sente, engoye hamu n'ebyokulya.

Abaana baikaraga nibarwaara kandi baanukire habwokuba baraaraga enjara.

Mukazi we yaikaraga narwaara rwaara habwa endya embi. Omusaija nawe akaba ayanukire habwokuba tiyabyamaga abaana nibacura enjara.

Omusaija Obuyarozire obwomeezi bumulemere yamanya ngu bakumuroga nikyo abaana be baikarraga nibarwaara hamu na mukazi we.

Nahabwweeki yagenda owomufumu amugambire bantu ki abaali nibamuroga.

Obuyahikire owo mufumu yamugambira ebizibu bye byona. Nandi we yamugamba ati, "Musaija mugenzi wange ebyaawe bibi muno.

Kyonka nkugenda kukukonyera nkuhe omubazi baleke kukuroga. Genda omu bitooke ondetere iharaiga."

Omusaija yagenda yalireeta. Hanyuma omufumu yataaha omunju yagaruka ezingiremu engata.

Hanyuma, yamugamba, "Buli nyenkya kara oimukege saaha ikumi naibiri eza nyenkya.
Enu engata ogiikazege omu mulyango gwaawe.
Onabirehoga amaiso, hanyuma ogisambehoga noiruka nenfuka nogenda omu musiri notemaho enfuka emu rundi ibiri kuhikya ojwahire. Kinu okikolege buli kiro oihireho ekiro kya sabiiti ogendege nohumura."

Omusaija yamusiima yagenda. Obubwakiire nukwo yakozere, kandi yagumizamu atyo buli kiro.

Hanyuma yemyeezi esatu, omusaija akaba aina omusiri abyairemu ebyokulya. Ebicooli, oburo, ebitooke hamu n'ebindi byoona.

Abaana be batandika kulya, nokunywa hamu nokuraara baigusire. Mukazi we yatandika kunyeeta kandi n,abaana be baaleka kurwaara.

Omusaija yatandika kutunda ebiyalimaga kandi yatandika kugaigahara. Yacwaamu kugenda kusiima omufumu.

Obuyahikireyo yamugamba ngu, "Webale muno. Oli mufumu wamaani kwo."
Nandi omufumu, "Leta engata nakuhaire."
Omusaija yagireeta.

Yamugamba, "Gyanjuure." Yagyanjuura kyonka hakaba hatarumi kintu kyona.

Nandi omufumu, "Tinyina mubazi nakuhaire. Baitu ekizibu kyaawe bwali bugara. Genda hati oyeyongere kukora."

Nandi omusaija, "Weza nukwo kiri. Webale kunyigurra amaiso."

Obugara bubi.