Jamanu ɓoyma nder lesdi Fommbina, weelo saatungo waɗunoo haa himɓe ɗon ngasa cuuɗi konndorle ngam ɓe keɓa gabbe.

Woodi goɗɗo tampi ko nyaamna ɓesngu muuɗum. Nden o wii kore maako, "Haa mi ɗaɓɓitonoya en nyamdu." O dilli.

Nde kore on somi rentugo-mo, o wartaayi, o hoosi baygooje ɗe o heɓunoo to inna maako. O defani ɓiɓɓe ɓen.

Gorko on jenginii, nden walaa ko o wartiri. Kore maako jaɓɓii-mo. Kore on ƴami-mo, "Woodi ko keɓɗon na?" O jaabi, "Walaa ko keɓu-mi."

Nden o rottani goriiko baygooje ɗen, o nyaami o haarayi.

Goriiko ƴami-mo, "Haa toye keɓuɗa baygooje belɗe ɗe'e?"

Kore on jaabi "Baygooje daada am ɓilata dow suudu."

Ton caka jemma goriiko hoosi ɓaargal, yahi wa''ii suudu esiraawo muuɗum ngam wujja baygooje.

O ɓaari ɓaargal, ngam o wa''oo suudu nayeejo on.

O fuɗɗi wa''aago suudu ndun to baygooje ɗen ngoni.

O ɗon wa''oo tan suudu yulkitii, pararam! O yanti dow pawte esiiko.

Nden o hafti, o wii, "Salaamu alaykum, puleldewel, minon min himɓe asama, min woni aranndeejo nder tato waranayɓe-ma, luttuɓe boo ɗon dow laawol ngara!"

Pulodebbo kam hultori masin.

O doggiri dammugal ngam o wurtoo. Amma, gorko on arti-mo wurtaago.

Ɓe fuu ɓe ɗon mbooka, gorko doggiri fuuna, pulodebbo boo doggiri hirna.