Zaman kureyen Maina laa tambuna su baa. Shidә Mai Dunomabe tadanzә tok tilodәma. Ngawo saa kadaro jezanayen duwo katambo. Maidә kam shiga waratatәma majin.

Sokku tambuunadәn Maidә karәgәnzә kәji nankadero sunzәdә ashirro rowono. Ferobi yaye sunzә guljiya kamu Mainadәbero waljin.

Sa Maina na nambero nazәgәnan, Maiye wowurmaro gulzәge ferowa awulaksana lardәbe ngasoro kawlulidә wurmazәgә sә.

Isa gaska su Mainadәbe gultәteyedәro rәptaa. Ferobi yaye nasartәnadә kamu Mainabero waljin.

Kawuwa samnodәro gapsәnadәn ferowa dawari badigada. Kәlanza kәrza, fәrgaminza kamza, nalle shinza-a mukkonza-aro kәrza, telayen kare bәlin sodutu.

Laa ye malәmyen leza fatiya samowu. Kanadi baama ye larawumayero leza sandiro wuzә kәnasarrawaro.

Yim samnoyedәn, nduso Mairi kadujin. Maina-a babanzә-a, kaliyawaye sosordaa nduson burwonro leyada. Ferowadә, kazәmuwanza-a ngalwo-a zayenza ngalwo-a Mairiro nuwajaa.

Abiso dawartәna. Wowurmaye samnodә baditәna sә wurmajiwo. Ferowoso isә suwa yakkә guljin. Sudә citaga samno ba dazәna, setanyiga, fero gade suluyin.

Fero burwoye suluwu wono, "Modu wa?"
"Mommodu wa?"
"Matta wa?"

Daji Mainaye wono, "Fandәmi feroma kәraminyi. Fandәmi kalkalro."

Fero kәnindimiye suluwu wono, "Bukar wa?"
"Umar wa?"
"Usman wa?"

Daji Mainaye wono, "Fandәmi feroma kәraminyi. Fandәmi kalkalro."

Fero kәniyakkәmiye suluwu wono, "Ali wa? Zubair wa? Abba wa?"

Daji Mainaye wono, "Fandәmi feroma kәraminyi. Fandәmi kalkalro."

Samnodә kawu kadaro cado amma ndumaye sudә sәtayi. Daji wowurmaye loktudә sasarana sә mawuwono.

Fero laa mbeji yanzәbe shiga lezәro ndәlamzәgә. Ngawo cidanzә fatoye sәdә dazәnayen, dawaratә ciwono. Ngawo lezәnayen, yanzәye shiro barra dәpciwo.

Kәmurso laa tilonzә curo. Shiga lewazә kuru abi mazalnzәwo sә cuworo. Kәmursoye wono, "Watәwoson na adәn isәke jengin wanee kam laa fandәke kәlanyi kәrjinnge. Ferowa isa kozana sammaye ada wuro loktunza ba ada."

Ferodәye karәgәnzә gәnazә daji kәlanzә kәrwono. Kәmursoye shiga cuworo, "Feronyi, ndara lenәin? Abi manәmin?"

Shiye wono, "Mainadә tambunaman ndumaye sunzә nozәnyi illa babanzә. Ndu yaye sudә guljiya kamu Mainabero waljin."

Kemursodәye wono, "Mainadә sunzә Tatasko."

Feroye shiro askәrzә lewono. Sokku na samnoye nazәgәnadәn, nәmngewu ambe surunadә karәgәnzә kamgategә. Nonguzәna- kuru rakesә suluyinba. Takcindә wono, "Awo adә nuwanyi." Culuwo.

Ferwa gadәye shiro yiljaa, ada sandidә shiro ngalwowo. Amma Mainaye ci sәkkә daji shiga kollgada.

Daji suluwu wono, "Ibrahim wa? Kassim wa? Kagu wa?" Daji Mainaye wono, "Fandәmi feroma kәraminyi."

Ferodәye wono, "Nongәna duwo ronyiro riwoko." Daji Mainaye shiro manazә sә shiga ndәlamjiwo. Feroye wono, "Tatasko wa?" Daji Mainaye yillono, "Kalkalro fandәma!"

Kәlele nyiyabedә am cintәye-a karәngәye-a sammaye adargada, daji karәgәnza kәjia kasaru.