Meeɗii waɗɗe jamaanu ndamndi naatii diina.

Ndi woni heen haa ɓooyi, ndi tawi wahre mum ndee juutii, ndi fotii hankadi yahde hajju Makka. Ñande wootere, ndamndi dawi, wi'i na yaha hajjoyde.

Ndamndi hawridini njooɓaari mum fof, haa timmi. Ndi fini, ndi dawi, ndi nanngi laawol funnaange.

Bimbi law, endi yaha tan haa ndi wiidi e Fowru hennet, e hakkunde boowal!

Fowru wi'i ndi, "Assalaamu aleykum!"

Ndamndi wi'i, "Waaleeykum assalaam! Ndamndi, hol to ndawan-ɗaa? Miin dee, ko mi jiɗɗo hajjoyde Makka."

Tan Fowru heɓɓitii, wi'i Ndamndi, "Hajju maa timmii, ɓayri en kawrii kay! Sabu kala mo maayi e hajju, a jaɓanaama, wonaa?

Jooni noon, maa kaalanaa mi goongaaji tati celluɗi, walla mi ñaam ma!"

Ndamndi wi'i, "Eyyoo, mi jaɓii."

Fowru wi'i, "Acaa, haal mi nana, yaawnu!"

Ndamndi wi'i, "So mi anndiino, so mi dawrii gaay en pottat, mi arataano!"

Ɗoon tan Fowru teppitii jaleeɗe, ndu woni e tallaade e leydi. Ndu wi'i, "Goonga yanii!"

Ndamndi ɗoofii, dogi, faati wuro.

Fowru dogi haa heɓtii Ndamndi, wi'i ndi, "Addu goonga goɗɗo, heño!"

Ndamndi wi'i, "So mi hootii han wuro, mbii-mi yimɓe ɓee en kawrii gaa, tee a ñaamaani mi, hay gooto jaɓataa, fof'en njeddat."

Fowru yoorii kadi jaleeɗe, ndu wi'i, "Kooni ndaw goonga!"

Ndamndi fooɗii kadi faati wuro.

Fowru dogi haa heɓtii Ndamndi goɗngol, ndu wi'i, "Ina heddii goonga gooto!"

Ndamndi wi'i, "So a yi'ii aɗa waɗa ɗee ɗoo gaatureeje fof, ko a heyɗaani tan."

Tan Fowru teccitii kadi e leydi jaleeɗe, woni e tallaade. Ndu wi'i, "Koonga tigi noon!"

Ɗoon tan Ndamndi dogi kadi faade wuro.

Nde Fowru ummotoo e leydi ɗo jalatnoo ɗoo, taw ndi naatii dingiral wuro. Ko nii ndi daɗndiri fittaandu mayri.