Dimi bǝrnyilan karga. Naptǝ bǝrnyibe kǝlanzǝn suluwuna sǝ shawartǝ karaaro culuwo.

Lejin, lenjin, lenjin duwo Bultu kǝnanzǝ kawu kadabea kǝla fakkada.

Daji Bultuga lewaro dawono, "Yaa Bultu lale, Yaa Bultu lale, Yaa Bultu lale," shinson lewa dajinbadǝ, Bultube Dimiro guljiwo, "Lewa ngǝwoso gǝnyi
awonǝm laa de kǝnanyi yeje duwo," wono.

Sa Dimiye ngai fanzǝnan, guda gowono.

Sǝgashin, sǝgashin, sǝgashin duwo bunaram Bǝndibero najiwo, kozǝ shitin dawono.

Bultu ye gǝya! gǝya! gǝya! shiga kadujin duwo lezǝ shim Bǝndibero katti tǝlzǝgǝ dawono.

Bǝndiye Bulturo, "Kwana adǝ bunaramndeman Kamye kajinbaro wa walgono? Shimdero katti figǝmindǝ!" wono.

Bultuye jaawuga kaino, "A'a Alanguwuro bǝrzǝmba gǝnyide takko. Kǝmbunyide kadungo!" wono.

Bǝndiye wono, "Bultu, nyi ye kǝmbunyi diya, adǝro wuye nyiga dunge wa duwo kadim? Adǝro wande wuga shiruwusǝmi diya." Wono.

Daji Bǝndiye Dimiro wono, "Ngamaro karaaro kadim?"

Dimiye jaawuga kaino, "Wuye karaaro kadiko de sawu wudǝ Malǝm nankadǝro."

Bǝndiye wono, "Nda allo ruwone rukke haiyamaro
kǝrmalǝmdǝa tawattaaro." Dimiye jaawuga kaino, "Allonyidǝ zau maro zaude."

Bǝndiye wono, "Shiwal ba abi nǝmzaunzǝ yaye gulle. Wuro awo laa tǝyerinma mbeji wawo?"

Dimiye wono, "Allodǝ sǝmo Bultuye."

Daji Bǝndiye sǝmo Bultuyega mbǝrǝk mbǝksǝ Dimiro kaino.

Dimiye sǝmo Bultubedǝa sǝmowu, shimye kǝmǝtdǝ jiwi kǝmagǝnbero sǝkkǝ sutulu Bǝndiro caino.

Bǝndiye sǝmo Bultubega jigǝroa zauro kǝji.

Shiye Dimiga ciworo, "Sǝmo faldǝ ye kudoro mowonjin wa?"

Dimiye wono, "Barganǝmin nyiro kudoro mowonjin ke." Daji sǝmo Bultube faldǝ ye nzoksǝ Dimiro hajiwo.

Dimiye sǝmodǝga sǝmowu cabedǝgai jiwi kǝmagǝnbero sǝkkǝ lǝpsǝ sutuluwu Bǝndiro caino.

Kuruson, Bǝndiye Dimiro wono, "Karawidǝ yen mowonjin wa?" Dimiye jaawuga kaino, "Tǝmangǝna mowonjin barranǝmin."

Bultuye adǝ fangonnya, daji ronzǝ suluwingairo kangulero ciluwo, loi, loi, loi, loi. Bǝndiye, sǝlang, sǝlang, sǝlang, ngawonzǝro ndǝpciwo.

"Adǝma kǝndǝga karaabega," Dimiye wono, "Daji fatoro waltǝnama ngǝla wo."