Tsuutsu yɛ maŋ ko ni atsɛɔ lɛ Hulumaŋ lɛ nɔ lɛ, gbekɛ yoo ko kɛ naji kakadaŋŋ hi shi. Atsɛɔ gbekɛ nɛɛ Aku.

Aku jwɛɔ nibii babaoo ahe.

Be komɛi lɛ etsɛ, Ataa Ankra, wuolɛinyo ko, haa Aku kɛ lɛ yaa faa lɛ naa koni amɛya sha loo yɛ elɛlɛ lɛ mil. Beni Aku miisha loo lɛ, ejwɛɔ nɔ hewɔ ni hulu lɛ kwɛɔ lɛ yɛ ŋwɛi lɛ.

Be komɛi lɛ, Aku waa enyɛ, A'anua, kɛ nihoomɔ. Aku jwɛɔ nɔ hewɔ ni mutsuru hiɛ tsuɔ yɛ tsene mli shi eyɛ wuɔfɔ su yɛ kpɔtɔmkpɔtɔ mli lɛ.

Ni Aku jwɛɔ nɔ hewɔ ni Oti, enyɛminuu lɛ, kɛ gbekɛbii hii krokomɛi lɛ hãaa ni ekɛ amɛ atswa bɔɔlo. Be ko lɛ, Aku bi gbekɛbii hii lɛ nɔ hewɔ. Amɛ ŋmɔ lɛ kɛkɛ ni amɛkɛɛ lɛ akɛ ekɛ gbekɛbii yei lɛ ayashwɛ.

Gbekɛbii yei lɛ tete taooo Aku kɛ shwɛmɔ. "Onaji kɛlɛ tsɔ," gbekɛbii yei lɛ kɛɔ daa.

Aku he fee shoo. Enaaa mɔko ekɛ susu ejwɛŋmɔi babaoo lɛ ahe.

Shi Aku kɛ hulu lɛ babɔ naanyo.

Daa leebi kɛji ete shi lɛ, ekpaa hulu lɛ gbɛ. Wuɔ gbɛɛmɔ shiɛɔ hulu lɛ shitee. Aku sumɔɔ ni ejo yɛ leebi maŋkpa hulu lɛ mli, be mli ni esusuma hu joɔ. Loofɔji agbɛɛmɔ lɛ haa wuɔ gbɛɛmɔ lala lɛ ŋɔɔ soro.

Hulu lɛ hã Aku yi obɔ kɛ miishɛɛ. Hulu lɛ hã Aku ŋmɔ bibiibii babaoo.

Gbi ko lɛ, hulu lɛ eteee shi. Aku mɛ wuɔgbɛɛmɔ. Wuɔ ebooo. Loofɔji lɛ hu laaa.

Ni kɛji hulu bɛ lɛ, Hulumaŋbii lɛ nyɛɛɛ amɛ daa kɛ daa nifeemɔi lɛ eko afee. Okwaafoi nyɛɛɛ amɛ ŋmɔji ashi amɛyasaa. Ni ŋwɛi fee lamulu su kɛ awerɛho. Ataa Ankra nyɛɛɛ faa mli looshamɔ eya. Gbekɛbii nyɛɛɛ amɛnaa amɛbua koni amɛya skul. Ni yei nyɛɛɛ jaji lɛ anɔ amɛya, kɛha samala kɛ grasin naa jarayeli.

Aku shwe enɛmɛi fɛɛ. Aku shwe wuɔ kɛ loofɔji agbɛɛmɔ hu.

Ni eshwe hulushitee lɛ po tsɔ.

Mɔ fɛɛ mɔ tao ni ele he ni hulu lɛ etee. Mɛi komɛi kɛɛ, "Eko lɛ hulu lɛ egbo." Fã bii hu kɛɛ, "Hulu lɛ efã gbɛ."

Aku kpãaa gbee ekɛɛ, "Daabi, hulu lɛ gboko. Hulu lɛ efãko gbɛ hu. Kulɛ ebaakɛɛ mi dã."

Mɛi komɛi ye Aku wiemɔ lɛ he fɛo. Shi Aku tee nɔ ewie akɛ, "Anɔkwa. Minaanyo ji hulu lɛ. Egboko. E–"

Shi mɔ fɛɛ mɔ kpa Aku toi boo. Mɔ fɛɛ mɔ hiɛ kpa hulu lɛ nɔ. Amɛŋmɔ Aku jogbaŋŋ. Gbekɛbii lɛ hu ŋmɔ.

Gbekɛbii lɛ aŋmɔlɔ lɛ dɔ Aku fe fɛɛ.

Kɛ awerɛho tamɔ ŋwɛi lɛ nɔ lɛ, Aku sha ehe ebote eshia lɛ mli.

Yɛ gbɛ lɛ nɔ lɛ, ejeee gbɛ ni enane tswa enyɛmi nuu lɛ bɔɔlo lɛ. Bɔɔlo lɛ kokro etee kpata lɛ shi. Tsene kɛ emli mutsuru ma kpata lɛ koŋ kome mli. Bɔɔlo lɛ tswa tsene lɛ. Tsene lɛ kpa.

Mutsuru lɛ shwie. Mutsuru lɛ kpa bɔɔlo lɛ he.

Oti kɛ enaanyo ko bote shia lɛ mli koni amɛyakɔ ebɔɔlo lɛ. Ena tsene ni ekpa lɛ, mutsuru ni eshwie lɛ. Ena ebɔɔlo ni ewu mutsuru lɛ hu.

Dani eeejo foi ni eyakɛɛ A'nua nɔ ni Aku efee lɛ, Aku kɔ bɔɔlo lɛ ni ewo foi. Gbekɛbii hii lɛ nyiɛ Aku sɛɛ. Amɛ fɛɛ amɛ kɛ A'anua kpe yɛ agbo lɛ naa. A'nua na ni Aku hiɛ bɔɔlo lɛ.

Dani eeetsɛ Aku ni ekã ehiɛ lɛ, Aku jo foi eho ehe.

Oti, A'anua kɛ Hulumaŋbii lɛ fɛɛ kwɛ Aku yisɛɛ be mli ni Aku jo foi lɛ. Amɛ kpa amɛ yitsei amli nɔ ni Aku kɛ bɔɔlo ni ewu mutsuru lɛ yaafee.

Aku wa edamɔ shi be mli ni eshɛ maŋ blohu lɛ teŋ tutuutu. Ekɛ bɔɔlo lɛ fɔ shikpɔŋŋ.

Aku sha eniji kɛ naapkɛɛ hekãa, esha enane kakadaŋŋ kome fitirifitiri ema ekome sɛɛ, kɛkɛ ni etswa bɔɔlo lɛ. Bɔɔlo lɛ kokro ebɔle shi yɛ shikpɔŋŋ, ni eyi mli kɛ tee blohu lɛ koŋ afã. Bɔɔlo lɛ yatswa ŋme tso ni ma blohu lɛ afã lɛ fãji ashishi.

Kɛkɛ ni bɔɔlo lɛ fã etee ŋwɛi tasuu lɛ mli. Amɛnaa ni ekpɛ amɛhe sɔŋŋ hewɔ lɛ Hulumaŋbii lɛ gbɛ amɛdaaŋ, be mli ni amɛkwɛ bɔɔlo lɛ yisɛɛ gãã kɛtee ŋwɛi shɔŋŋ. Bɔɔlo lɛ filiki eho atatui lɛ ahe, eho heni hiŋmɛi aaana.

Nɔ fɛɛ nɔ shɔ. He fɛɛ he fee dioo.

Trukaa lɛ, ŋwɛi tse. Atatui lɛ fee futaa, koklobii kɛ funyafunya. Kɛkɛ ni bɔɔlo wulu ko fã kpo kɛjɛ atatui lɛ asɛɛ. Bɔɔlo nɛɛ kpɛ haŋŋ. Bɔɔlo lɛ etsu ni eyɛ wuɔfɔ su tamɔ mutsuru pɛpɛɛpɛ. Bɔɔlo lɛ ji hulu lɛ.

Aku hulu lɛ.

Nɔ fɛɛ nɔ fɛne. Dioofeemɔ lɛ tee.

Be kukuoo sɛɛ lɛ, mɔ fɛɛ mɔ bɔi shiayaa kɛha gbi lɛ nifeemɔi agbɛjiianɔtoo.

Ataa Ankra tao eloo goga lɛ. Okwaafoi kɔlɔ amɛ kɔii. Gbekɛbii ju amɛhe ni amɛsaa amɛhe, ni amɛfee skulyaa he kralo. Yei fimɔ kapɛji kpɔ yɛ amɛ nɔhaa mamai lɛ anaa. Amɛtere amɛ gagbai kɛ kɛŋtɛŋi lɛ ni amɛ sha amɛhe kɛtee jarayeli.

Hulu kusɛɛ eba Hulumaŋ. Aku ni fee. Gbi hee je shishi...