Ku kyalo Kyanda, ne eyali olubiri olwa Kyabazinga Nasani Lwigale.

Kyabazinga ono yali ni baghala be abaguna musanvu. Baali balungi okukamala.

Obulungi bwaibwe bwali nga ezira kyo osobola kubugezaaku.

Abasaadha bangi beesombanga okwiidha mu lubiri luno okusaba abaguna bano obufumbo.

Aye abaguna bano baadheemanga. Baabonanga bati abasaadha bano bonaboona abaidha mu lubiri muziramu babasaanira.

Abaguna baatyamanga ghalala beegeyaamu era beisanhya oti nseete.

Baasalagho bati: "Twiidha kufumbirwa oyo omusaadha yenka anaamanha amainha gaife twenatwena." Era batyo baakobera Iseibwe ekyo kye baali basazeegho.

Kyabazinga yeena tiyalwa. Yaayeta olwekobano mu lubiri okulangirira omutwaalo gwa baghalabe.

Abantu bangi okuva eno ne ere beesomba okwiidha mu lubiri. Nga bayenda kumanha kiki Kyabazinga kye yali ayenda okubakoba.

Kyabazinga yaasanhuka kubanga abantu baidha mu bungi.

Kyabazinga yaabakobera ekyo baghala be kye baali basazeegho.

Abantu bonaboona tibaamatira ekyo ekyali kibakobeibwa.

Abasaadha baatandika okwidha mu lubiri okuteeba amaina aga abaguna bano.

Aye ezira yasobola kuteeba kituufu mu mwaka ogwasooka.

Kyali kizibu kubanga ni mu lubiri yali ezira eyali eikirizibwa okweeta baguna bano maina gaibwe.

Abaguna beene beeyetanga amainha okusinziira ku kikulakula. Nga ni banaibwe tibasobola kubamanha.

Baabeetanga bwa Kampi, Kaghanvu, Kyeru, Kairugavu, Mutiibwa, na agandi gatyo kamaala.

Aye ku kyalo okwo, kwaliku, omusaadha eyali omugaiga aye nga mubi mu mboneka, envaala, na buli ngeri.

Era ono omusaadha yali yalumbibwa enfunza ku buli kitundu kya mubiri gwe.

Lwali lulala, omusaadha ono yaalangirira ati: "Nja kukwa abaguna omusanvu."

Abantu ku kyalo baamweta mulalu. Ni baghala ba kyabazinga baamusekerera. Baakoba bati: "Tasobala kutukwa olwemboneka ye."

Enkyo lyaku, omusaadha ono yaita embuzi ye ennume eyali ne ekirevu ekinene. Yagisalaku ekirevu kino yaakita ku mpasa. Yaata empasa mu ngira abaguna bano mwe baali babitanga buli kunkyo.

Omusaadha ono bwe yamala okuta empasa eno eyaliku ekirevu mu ngira, yeekweka mu kisiko akyali okumpi agho.

Omuguna eyali emberi yeekanga inho bwe yabona empasa eye ekirevu.

Yaayeta mwine eyali amwiririire ati, "Labeeka." Labeeka yeena yamwiramu ati, "Kiki Alyeti?"
Alyeti nokumwiramu ati, "bona empasa eye ekirevu."

Alyeti bwe yabona, yaayeta Babita eyali ogho ati, "Babita!" Babita yeena yaayeta Vanisa eyali amwiririire. Vanisa yeena yaayeta Midiridi eyali amwiririire. Midiridi yeena yayeta Petwa ni Beesi abaali basembyeeyo.

Olwokwesisighala okungi, abaguna bano bairayo ghaka era tibaabonekaku mu luya.

Mu bwangungu neisanhu, yaatoolagho empasa ye era yairayo ghaka. Yatandiika okwetegekera okuleeta abaguna bano omusanvu ghaka.

Yaaja ku mulirwano yeeyazika suuti etuukaana noomukolo ogwo obufumbo.

Mu lubiri, yayagaana kyabazinga ni baghala be abandi nga batyaime agho, era yaabakobera ekyali kimuleese.

Abaguna baamusekerera nga bamukoba bati: "Kisaadha ighe totusaanira era tosobola kutughasa."

Enseko dhaabakalira ku matama nga omusaadha ono atandiise okweta amaina gaibwe mulala ku mulala.

Bwe yamala okubeeta amaina bonaboona, beegayirira Iseibwe bati: "Otatughaayo ya musaadha ono owe mpasa eye ekirevu okutughasa."

Iseibwe yaabairamu ati: "Baana bange, mwaasalagho muti mwiidha kufumbirwa oyo omusaadha alimanha amaina gaimwe mwenamwena. Tisobola kusazaamu kisuubizo kyaimwe."

Iseibwe yaabaghaayo okufumbirwa omusaadha ono. Nabuti, abaguna bano baliyo era bafumbo.