Bul, Teke, Tongoli, Millege, Sos kodi Gwara jo bedo mere matek swa. Jo bedo thum ma goyo wer. Jo bedo kanyaciel Rugot moro de koro.

Jo je jo bedo jo ndijo matek swa i wer. Lwo fore gi winjo wer pa jo kodi miel ka jo luwo mayindo wer.

Jo ndijo wer me jo mito yero jatel pajo. Ŋat matek loyo ama obedi kere.

Yer ma ŋatatek loyo le cungo kwoŋ nyalo matimo tic ma opokere opokere kodi wer idwondi ma winjere cegin kiri gi bor.

Tongoli ama otelo luwo ka waco ni, "Aŋatatek loyo. Awero dwondi mathindho gi madongo je. Anigi fuc kweth ma ywak dwondi ma opokere opokere. Anyalo wero kendan odoko anyalo wer i kitipa. Ji mathindho gi ji mutegino jo maro miel wer paran. Bende Akwano kir wer ri Fumbo."

Fumbo oyere ni, "Ojame Tongoli, i tire, to, i kiloyan. Dwodin nipiny swa. Aparan nimalo doko opye. Derino paran winjere cegin kodi bor."

Fumbo omedere ka waco ni, "Ji jo mielo gi wer paran pa buti gin tur! Amiyo ji miel kada obedo i siem kosa i teko! Nyithindho jo maro poro dwondan ka jowero ni, 'coko manyoro no dwoki i daki. Abom kelo tho'."

Millege oyere ni, "Wi jo je witek." To medere ni, "An tic paran yot. Jo miel jo tweyan iy odondo tyendi jo. To jo jiewo tyendi jo piny luwo mayindo wer aka awodho wer paran. Awodho aruwa ma dwondi ma nimalo kodi mabith. Juwotan, akitek be?"

Ana Bul ni, "Meno dwoŋ swa! An ocweyan nyaka gi pyen ma oteli to i kwoyo wikor yath mothuth. Amiyo mayindo ri wer odoko dwondan nyutho gikipiny kweth. To, akinyal wiro dwondi mathindho kosa madongo paka wi jo megi. Akipari ni atek."

Gwara opyemo ni, "Bul, i timo gikipiny ma dongo! I lwoŋo ji romo, lamo, timo tic makonyo piny, ka tho obedo kodi i teko man je. I ywak i kisi cowirok aka i kelo miel iteko kodi isiem. Aneno ni i ŋat i tek loyo."

Gikenyo Gwara okoko gi derino swa ka waco ni, "A winjere malo doko aywayo paro pa ji. To kada ameno, akinyali loyo Bul. Ri ameno, ayero Bul wobedi kere."

Jo ndijo ma wer jo ŋiyere waŋ ma jo liŋ gi dhyer. To Tongoli waco ni, "Bul sisiri swa ma ki ripi bedo kere. Aŋatatek loyo rupiri awero dwondi mapiny gi mamalo je aka i yoto."

Sos ma oyido oliŋ aliŋa be to luwo. Owaco ni, "Jo wotan, ndir je a wero gi win. Wi joje wi bedo jo ndijo ma wer. To kada ameno, Bul ama ripo gi bedo kere."

Sos omedo waco ni, "Ŋat ma ki winji dwondi Bul meno calo kasik! Bul ywayo ji kabute aka thyelo jo gi wer pere i teko kodi i siem."

I cowe mere, jo ndijo ma wer jo yero Bul bedo kere pa jo.

Woki ndir no, Bul ama obedo kere ma wer je. Meno am omiyo kir pama Bul nwaŋere i kis peco ma Rugot agono.