Kadzeni ligundvwane nelikati bekubangani labakhulu.

Kwatsi ngalelinye lilanga ligundvwane liphetfwe yindlala, umngani walo Kati angekho.

Ligundvwane latsi lisafuna lelingakudla, latfola kutsi kudla kwalo kuphelile. Phela beselikhohliwe kutsi likudle lakucedza ngayitolo.

Ligundvwane labona lubisi lwemngani walo Kati. Labita bantfwana balo kutsi bete batodla lubisi lwaKati ngobe angekho.

Utsite nakabuya kati, lubisi lwakhe luphelile. Loko kwamangalisa kakhulu. Waba nemibuto ledzinga timphendvula. Phela umngani wakhe Gundvwane akalunatsi lubisi. Pho kwentenjani? Uyatibuta atiphendvule Kati.

Likati labita umngani walo Gundvwane. Mngani wami awukaliboni lubisi lwami? Kusho likati. Cha mngani, angilati. Kuphendvula likati.

Likati selitfukutsele. Yini lena lemhlophe emlonyeni wakho, ingabe nguwe lonatse lubisi lwami? Kubuta likati. Hawu mngani akusilo lubisi lwakho leli, mina ngiwe emlotseni ngemlomo. Kuphendvula likati.

Uwe emlotseni, yini kungenta silima Gundvwane? Kubuta likati. Likati lavele latsatsa ligundvwane lalifaka emlonyeni lingakacedzi nekuchaza. Bantfwana beligundvwane babaleka bangabuki nasemuva, likati libagijimisa. Kungako nalamuhla likati ligijimisa onkhe emagundvwane leliwabonako. Lingalibamba liba kudla kwalo.