Umteki: kwesukesukela Balaleli: cosi Umteki: Kwesukela Balaleli: bamhlabe ngesigozwana imbit'alenkhulu Umteki: Ngalelinye lilanga emgodzini lapho kulahlwa khona tibi, emabhodlela acala atsi, "tsine bantfu bayasisaba, phela tsine siyasikana" asho acocela emapulasitiki, emaphepha kanye nemabhodlela epulasitiki.

Emaphepha, emapulasitiki kanye nemabhodlela emapulasitiki avele aluphosa luhleko ase atsi, "tsine bayasihlonipha futsi bayasitsandza." Emabhodlela aphatseka kabi kakhulu ase acala kubasika bantfu nabawanyatsela noma bawabamba kantsi afile.

Bantfu bacale batenta ngatsi bahlakaniphile, bachubeka bavala tindlebe. Akatibekanga phansi emabhodlela, achubeka abasika labadzala nalabancane. Batfukutsela bagana lunwabu bantfu, bacala kuwabulala lamabhodlela bangati kutsi bawentela umsebenti ube malula. Njengoba akatibekanga phansi emabhodlela, achubeka njalo bate bantfu bacala kucabanga lelinye lisu lekuncoba lemphi.

Bantfu base bacala kuwacabangela lisu kutsi bangawentani nje kuze ajabule nawo, bacala kutsi nabatfole libhodlela lilahliwe balitsatse bakhe ngalo intfo lenhle. Kwawajabulisa kakhulu loko emabhodlela kutibona sekamahle ngalendlela sekahlala endlini nebantfu.

Aphatseka kabi kakhulu emapulasitiki, ase acala kufuna kunakwa nawo. Betitsi lapho timfuyo tebantfu tiwadla, tivele tife nje. Bantfwana badlale ngawo bawagcoke enhloko, ngeliphutsa nje lingavala buso, umntfwana loyo uyafa. Baphatseka kabi bantfu, bacala kuwasebentisa nawo, bakha tintfo letinhle letibalulekile ngawo. Bakha tigcoko tekuvikela lilanga, emacici, emacansi nalokunyenti.

Emaphepha nawo abona kutsi atawusala odvwa. Abese acabanga lisu lekutsi nawo anakwe. Abona kuncono kutsi uma umuntfu awafake emgodzini wona aphume agcwale libala lonkhe. Kwamnyanyisa kakhulu loko umuntfu wase uwacabangela lisu kutsi angakha ini nje ngawo. Bakha imihlobiso lemihle kakhulu ngemaphepha lebeyitsandvwa nabantfwana.

Emabhodlela emapulasitiki besekasele odvwa kepha umuntfu wabona kuncono awasebentise nawo akhe lokutsite ngawo angakate asusa lenkhulu imphi. Wakha tintfo letinhle futsi letingasiyo ingoti. Bantfwana bakhona nekutfola tintfo tekudlala nabo letingakatsengwa etitolo. Betitinhle kakhulu leto tintfo futsi taba tinyenti kakhulu.

Besetijabule tonkhe manje, setibona kutsi tonkhe tibalulekile futsi tiyatsandvwa ngalokulinganako. Umuntfu naye wabona kukuhle loko lakwentako kuvikela imvelo, ihlale iphephile. Wachubeka wakha imihlobiso watsengisela nalabanye, yahloba nemvelo, yaphepha.

Umteki: Cosi! Cosi! Iyaphela                                            Umbhali: Maphanga Sihle.