Tikhatsi Letimnandzi
Thabile Veronicah Makamo
Catherine Groenewald
siSwati

Thembi naThemba bahamba nababe wabo babuya esikoleni. Bobabili bajabule kakhulu. Ingani phela tikolo betivalwa. Kubo loko bekusho kucala kwetikhatsi letimnandzi.

1

Ekuseni kakhulu babe wabo wabatfwala ngemoto wabayisa kagogo wabo. Endleleni yabo babona tilwane letehlukene letifaka ekhatsi tindlovu, tindlulamitsi kanye nengwe.

2

Gogo wabo uhlala emakhaya. Unensimu yakhe lapho ahlanyele khona tibhidvo takhe latitsandzako, kantsi futsi unemfuyo.

3

Gogo wabo wajabula kakhulu kubona batukulu bakhe bamvakashele. BoThemba naThembi banika gogo wabo tipho lebebamphatsele tona. Wajabula waze wagiya kukhombisa injabulo labekanayo.

4

Ngalelinye lilanga ekuseni Themba wagijinyiswa yinkhomo ngesikhatsi angene esibayeni atsi uyofundza kusenga lubisi.

5

Ngelilanga lelilandzelako Themba naThembi bavuka ekuseni basita gogo wabo ngemsebenti wasekhaya. Thembi yena wavele wajabulela kubamba emacandza netibhidvo letibuya ensimini yagogo wabo. Themba yena bekaphetse tinkhuni neludziwo lolunelubisi.

6

Ngalelo langa lilanga belishisha likhipha inhlanti emantini. Emvakwaloko bahamba nagogo wabo emakethe bayomsita kutsengisa titselo netibhidvo. Phela letitselo naletibhidvo betivunwe ngugogo wabo ensimini yakhe lenkhulu lesekhatsi nelikhaya.

7

Sebabuyile kuyotsengisa bafika bahlala etafuleni. Gogo wabo wabaletsele kudla kutsi badle batolala baphumule. Phela bekulilanga lelidze futsi bebasebente kakhulu.

8

Lesikhatsi semnyaka basitsandza kakhulu ngobe batfola litfuba lekuhamba bayobhukusha. Ingani phela ngulesikhatsi semnyaka lapho kushisa khona kakhulu. Bakujabulela kakhulu kuba kagogo wabo ngobe bebavakashe ngesikhatsi semnyaka lebasitsandzako.

9

Themba yena bekatsandza kugibela esihlahleli abambelele ngetinyawo takhe. Thembi naye bekakutsandza loko kodvwa bekangakhoni. Bekavele atsele Themba ngemanti badlale. Thembi watjela umngane wakhe kutsi abazame kugibela esihlahlani bente njenga Themba.

10

Batse basazama kugibela boThembi nemngani wakhe bawa phansi. Babanenhlanhla lenkhulu ngobe abazange balimale. Themba naThemba babanesikhatsi lesimnandzi kwaze kwafika sikhatsi sekutsi kumele babuyele ekhaya.

11

Gogo wabo weva buhlungu ngelilanga batukulu bakhe babuyela emuva. Wabapha tibusiso, watsi baphindze babuye batomvakashela ngobe uyajabula kuba nabo.

12
You are free to download, copy, translate or adapt this story and use the illustrations as long as you attribute in the following way:
Tikhatsi Letimnandzi
Author - Thabile Veronicah Makamo
Illustration - Catherine Groenewald, Silva Afonso, Magriet Brink
Language - siSwati
Level - First paragraphs
© Thabile Veronicah Makamo 2016
Creative Commons: Attribution 4.0
Source www.africanstorybook.org
Original source