Bafundzi baseklasini, phela sesikhatsi selikhefu. "Ngiyatsandza nase kusikhatsi sekudla ngoba ngitawuhlala nemngani wami Musa", kucabanga Thandeka.

BoThandeka nalabanye bafundzi beme esitolo balindze kutsenga labatakudla.

Utsite angacedza kutsenga Musa, wahamba wayofuna Thandeka kute batohlala bobabili.

"Hawu mngani wami, kungani uhlale wedvwa" kubuta Musa. "Bengilindzele wena mngani wami. Phela ngiyakujabulela kuhlala nawe uma sidla", kuphendvula Thandeka.

BoMusa naThandeka bahleti bobabili bagone kudla kwabo. Basaticocela nje basengakacali kudla.

Batsite basathandaza balungiselela kudla kwachamuka Nomsa. "Ngisacela kudla nani mine anginako kudla namuhla", kusho Nomsa atikhalela.

Bavuma boMusa naThandeka bamemukela Nomsa waba ngumngani wabo lomusha. Batsite bangabona kutsi lokudla kuncane base baphindzela esitolo bayotsengela umngani wabo lomusha Nomsa.

Labangani labatsatfu sebamile esitolo balindzele kutsenga kudla.

Sebamile bagoce tandla balindzele kudla kwabo labakutsengile, phela bese bafile yindlala.

Kutsite ngembi kwemizuzwana basondzela batolandza lokudla labakutsengile. Musa ubukeka sekadvumele ngobe yena bekasafuna emaswidi lasebhodleleni kantsi imali seyiphelile.

"Ngiyetsemba uyajabula mngani wami Nomsa sewutawudla kanye natsi nyalo", kusho Thandeka. "Yebo bangani futsi ngiyajabula kutsi ngibe ngumngani wenu. Kumnandzi kuba nebangani labafana nani futsi ngiyetsemba sinawuphilisana kahle", kusho Nomsa.

Musa, Thandeka kanye naNomsa bachubeka baba ngebangani labahle. Bebahlala njalo bakutfokotela kuba ndzawonye.