Kwasukelasukela cozi. Kade khulu ugubudu asadla ubulongwe, kwakukhona iinlwana zemihlobo yoke.

Iinlwanezi zazinomelusi wazo onguPhiri usomilingo. Kuthiwa zazikghona ukwenza iimfiso kuye bese azifezekise ngombana wayenamandla amakhulu.

Iinlwanezi begade zihlala entabeni ede begodu ipilo yayimunandi ngebanga lobunengi bokudla ezazinakho.

Isiga esenzekako sabangela bonyana iinlwanezi zitjhuguluke zingasaba ngendlela ezazingayo, kodwana zibe ngale esizibona zingayo namhlanje.

Kwathi ngomunye unyaka ngesikhathi sesilimela, kwasahlela isomiso esikhulu. Kwatjha utjani, koma imilambo kanye nendawo yaphenduka ibhudu.

Iinlwana nazo besele zithoma ukonda nokutshwenyeka emoyeni. Bewuzizwa sele zibuzana zisithi, "kazi kwenzekani ephasini lekhethu?"

Umqasa nawo ubegade ungakazibeki phasi ngokutshanya kwawo. Begade urhatjha ivangeli lokobana iphasi liyabhubha.

Iinlwana zabamba umhlangano. Zaqunta ukuya kuPhiri usomilingo ziyokubuza bona kwenekani ephasini lazo.

Zaphetha ngokukhetha ibhubezi bonyana lizikhulumele nazifika erholweni lakaPhiri ngombana linelizwi elikhulu.

Ibhubezi lathomisa lathi, "Phiri somilingo. Melusi weenlwana zoke, sibawa usihlathululele bonyana kwenzekani ephasini lekhethu."

Kwathula kwathi du kwavunguza umoya ohlebako. Kwavela isithunzi esikhulu esinzima saphenduka uPhiri. Amezwi wakhe athi, "iphasi alibhubhi, kodwana liyatjhuguluka. Nani zilungiseleleni ukutjhuguluka."

Isomiso saragela phambili bekwaba lihlobo lonyaka wesithathu. Iinlwana ezinganamandla bezilele ubujadujadu zifa zibulawa yindlala.

IFukwana yabona bonyana ayisakghoni ukujamelana nokubona isizi langamalanga. Yanyula ukufisa kuPhiri bona ayenze ikhambe ngaphasi kwehlabathi, khona ingeze yabona amatlhuwo la.

Imbuduma yona yayokufisa bona uPhiri ayenze ibenamandla, khona izakwazi ukubambelela ngesikhathi esinzima.

Iinyoni namazuba, zakhetha bona uPhiri aziphe iimpiko ziphaphe zikwazi ukufika kude lapha kunokudla khona.

Idlanga lona laqabanga ngobuhlakali obukhulu. Lafisa bona uPhiri alenze lidle iinlwana ezifileko, khona lizakuba nokudla okunengi.

Le-ke, yindlela imikghwa yeenlwana yeza ngakho. Cozi Cozi iyaphela.