Kwesukasukela! Kadzeni tilwane betite inkosi. Tase tibona kutsi imphilo yato iba matima ngaphandle kwenkhosi. Tase tibeka umgomo wekutsi kube nguloyo naloyo atisho ngekubaluleka kwakhe nangabe afuna kuba yinkhosi.

Njengesilwane lesikhulu. Indlovu ngiyo leyacala kucala kutsi kukhetfwe yona. Sizatfu kwaba ngiso phela sekutsi yona yinkhulu kunato tonkhe letilwane.

Kwalandzela logwaja lowatsi "khetsani mine ngoba ngihlakaniphe kunendlula nonkhe."

Kutsite kusesenjalo kwavakala lufudvu nalo litsi "khetsani mine kutsi ngibe yinkhosi yenu ngoba ngimcane kunani nonkhe."

Tasho ngelivi linye tilwane tiphendvula lufudvu tatsi, "Angeke sikwati kutsi siphatfwe nguwe fudvu. Asiyifuni inkhosi lenwabutelako nayihamba."

Lukhozi lona lwatsi "khetsani mine kuba yinkhosi ngoba ngindiza ngiye etulu kunendlula nonkhe."

Isengakaliminti Lukhozi, kuvakale inyoka seyitsi "kungaba kuhle kutsi nikhetse mine kuba yinkhosi njengoba ngehlukile kunani nonkhe ngenca yekutsi ngite tinyawo."

Indlulamitsi yatsi yona tikwenyoka "yini nje wena longayenta ngoba kufanele kukhetfwe mine ngoba ngimudze kunani nonkhe ehlatsini lonkhana."

Ingwe yona yatsi kungaba kuhle kutsi kukhetswe yona ngoba unematubane kwengca tonkhe tilwane letikhona ehlatsini lonkhana.

Kwagcina libhubezi ngekutsi "Khetsani mine kutsi ngibe yinkhosi ngoba nginemandla kunendlula nonkhe futsi nginganidla nonkhe lapha endle."

Tilwane tavumelana ngekutsi libhubezi libe inkhosi yato. Libhubezi lajabula kakhulu kutsi tilwane tilikhetse njenge nkhosi yato. Kuze kube ngunamuhla libhubezi solo liyinkhosi yato tilwane cosi. Cosi iyaphela.