Abehasi bohu hyalo Mugangwe baali babayi be mbusi, etaama, ko n'eŋoombe. Bemeranga ebyayo byawe bulaŋi wene ohuhenaho omwaha, nundi banŋamba no gundi ni ŋabula bugosi wosiwosi.

Lwali lulala mu mugamba omubayi mulala nga abona ati etaama yiye ndala yahapuye omugoye naye seboneha. Nigaali nigendula mwisugu gageene embwa johu hyalo ehyo nijiri muhulya etaama yiye nga ahubba enduulu. Abaatu bohuhyalo badulumirira enduulu beboneraho embwa nijirya etaama. Nabandi balimo ne mbwa jaawe nijirya etaama.

Omubayi nga atina aŋaŋabira abene mbwa ewa ceyamani wa Mugangwe. Ceyamani gaŋandihira abene mbwa ohuja mukoti yiye e Mugangwe olwa sabiti mumugamba.

Olwa sabiti lwali luhili hwoola, omubayi owundi yesi nga etaama yiye egota, ni genduye mu mugamba gageene embwa mwisugu nijirya etaama.   Gahubba enduulu abatu badulumirira bagana embwa enyene jira ejibabonaho nijirya etaama.

Ni ba hena ohwita embwa, lulala mumugamba etaama yo mubayi owundi yagota, ni gendulu gageene ehisolo nihiriye etaama ni hirehireho enyama esinga obungi nga ahubba enduulu. Abehasi badulumirira enduulu omwali omusaja omusahulu nga babona enyama, namaglu age hisolo aŋa hyemirenge ni gali hya ge mbwa.

Ababayi na behasi abandi bejumuula balonda ceyamani nga gehasa oluhiho lulwe. Batiina ewa ceyamani asokerwaho nga bamulomera ebibageene. Omusahulu gaŋaaye ceyamani amagesi ohuyabisa eronŋo n'ohusita, nohuwiha eronŋo n'obusala obuŋeŋere n'amatu ku basasaleho obuloba hu matu, basidihe etaama mu lusito.

Muluhiho abehasi basalanŋo ohwita embwa josijosi hu hyalo Mugangwe.

Abehasi bahoola omusahulu ehigabaloma nga basindiha etaama mu lusito owire. Ni wahyeye batina ohulambula bageene Esuuje eguye mu guloŋo naye etaama neri ndamu. Abehasi basoosa Esuuje esira esoola hya nabe ohwosa olubayitira mwiroŋo. Ohuŋwa olwo abehasi si bagabolayo hu gosya taama jaawe.