Anyapa azini andra alu runi Lingiri 'i. Lingiri ni andra Anyapa azi ambo uriuriru ni 'i. Eri andra oa gulea oni amboruni ma etia.

Lingiri oki 'ba nyakua 'diyi dria dria pelu oku azi alu andra Okporovu runi 'i.

Okporovu 'diri ni oaria a'dule oce tia ogogo, ri mu eja o'du nyaka a'dizu.

Paale alu eri ni muria eja o'duria, o'du eja angiri eri ni ecole a'dule 'I ma dria a'dule si ku 'dinile ri. Nga di 'I ma ngulupi zi kini, "A'dini di nga eja a'du ma dria ni ya?"

Isu de mva Okporovu 'di ma aliari ma mba osizu ri eca ogogo 'bo. Okporovu 'di ni 'I epatraka ria lezu eja a'duzu'I ma dria, mva alenia ri nga embu amve mbila kini, "Eyaa, 'I fe ma a'du mi dria." Ba ni mva nde ma otubi lile kurisi nga ru ni 'da Otukolia 'i.

Otukolia ni zo ria were 'bo ria, nga 'I ma andri ni zi kini, "Eyaa, o'du dria ama lu oa mi be 'ba iri a'dule, ama vile 'ba azini 'diyi ngoa ya?"  Andri nga omvi ti nia kini, "Mi zo nga were dika."

Saa dria Otukolia ni 'I ma andri ma ale 'ya yi vile 'ba diyi ngoa yari ecezu 'I dri, te andri ni lu 'yo eri dri kini ma zo nga were dika.

Andri ni di mu ndre mva nde zo angiri ecozu 'I ma agei tezu ceni 'bo, nga di lu eri dri kini, Anyapa azini alu runi Lingiri 'I, oki 'ba yi dria dria ni, azini eri oa oni ma gulea ele andreleru te 'ba dayi dria nga idriru alenia 'dale ci.

Otukolia ma eli ni di mu ca mudri drini aziri di pi, nga di e'do idria si be ciza nene 'dini 'diyi ede kara kara. Ka mu 'I otu kililli 'bo, nga tu ri oni dria oru nga di e'do Lingiri ni omve o'duko oru si; Li---ng-i-ri-i-i-i-i, Li-ng-i-ri-i-i-i-i-i.

Lingiri ka mu eri 'bo, nga ai Yiyiyiyiyi-- yi -yi-yi-yi-yi-yi. O'duko ni ere angu Waa. Nga zi: Ma nya Bari yi dria, Ma nya Ndrua yi dria, Ma nya Ma'di yi dria, A'dini ma omve oru 'dile ni ya? Otukolia nga omve dika, Li-ng-i-i-ri-r-i, Lingiri ai vini alu rile, zi dika kini a'di ni 'I omve oru 'dile ni ya.

Lingiri nga di e'do efu gulearisi emuzu eri vu andre be nalu, nalu, nalu, wura be eka nene, otuzaru ngonde agu 'I omve pi ri nya zu.

Eri ni leria Otukolia ni e'daria 'I ma andre siria, idria te Otukolia vu si be ciza 'dayi si e'do andre ni oli-oli; ka andre eju 'dini, otukolia ni lira, eri eju, otukolia ni li ra.

Oli andre ni kpere eri ni aceria aliŋaru, azini okpo koko ru, nga di masete 'du Lingiri ma ale asizu.

Otukolia ni mu Lingiri ma ale asi 'bo, ba te alenia o'biru 'diyi e'do efu ayiko ambu ru be. Nga di eri dri awa'difo fee saaru eri ni yi dri driwala fezu Lingiri ma dria risi. Nga di eri 'ba yi ma drilia opiru erini Lingiri ni ndele rarisi.