Ahale yaliyo omusinde n'omuhasi buwe.

Omusinde ono gaali n'abaganda babe mwigulu.

Ehisera hyolire abaatu bano bombi baafa. Bafuye balehaŋo omufubbi naali museere aye natamanyire mwigulu.

Muhufa balehire ehiraamo ni hiroma hiiti "Mwana wange ofunanga omuutu yeesi gahuŋira mwigulu eri abaganda bange''."

Aye ebyo nibihiiri bityo abo mwigulu baŋeresanga omufubbi ono engoye ej'ohwambalanga.

Lulala omuseere ono omufubbi galoma owahye owali n'amanyire mwigulu amuŋireyo, owahye sigali mubi gefugirira ohumuŋira. Bategeha nga basimbula.

Nibangendaho bola aŋaatu nga omuseere genda ohutiina ohweyeda mu mugwanya. Kyoka omuŋerehi gamutusaho engoye gajambala nga ola amwambasa endoobe. Nga baŋahanira hwihyo engeri n'engeri.

Ono ati "pe engoye jange" Ola oti, "sonatiine n'engoye mu mugwanya." Omuseere ga ŋooye mu mugwanya batiina mungira nibaŋingirihana hubye engoye ati, "Wange pe engoye jange huli huupi hwola."

Aye omuŋerehi gagaaniye hungoye ohwosa olu bolire mwigulu omuseere ni gambaye ndoobe. Nibolire eyo abasemwaana bato bagoosa omuŋerehi kubanga njowali nigambaye engoye.

Owendobe bamuŋindiha peera mu ndimiro ya mubere hu huuma nyuni. Nigaali eyo mu nimiro nga gembanga ati, "Sii, sii, kalegeya leha hulya omubere gwabeene. Sii, sii, kalegeya, leha hulya omubere gwa bbaabba." Gembanga nindi gagaluhamo.

Abengo baŋuliranga ebi mu huumi w'enyuni gemba. Babyetegeresa bugali. Lulala balangire omuseere oyo bamubuusa hiina ehyene ehigira nigembanga atyo. Omuseere gabanyohyola ati "Ndiise omwaana wa muganda yenywe. Oyo namulomire hundeeta eno mwigulu."

Nigolire mungira ganyagaho engoye ejimwaperesa gajambala. Ese ganyambasa endoobe. Nahanda huhayana ninaye aye bbe. Gaganiye hungoye''. Ohuŋwa olwo abalebe b'omufu babbinga omuŋerehi nga batagiha ohugoosa omuseere wawe eyibaali ni babisya obubi naali munobe olw'endoobe.