Maani gatega omutego Wambeba naali mu hisuli namubona. Gatega omutego guno eno pwaloma ati, "Leha tege omutego guno naheeta embeba eyiteganya muno."

Wambeba gemulula gaaja galoma, Wangoho ati, "Wadwaayawe, Maani aŋwa hutega omutego munju buwe."

Kwegayiriiye, sala amagesi otiine ogutegule, ohene ogugosyeŋo, kubanga guja huleeta ebigosi. Enter text here.

Wadwaaya gageene era gaahajala ati, "Bbeee sipanga huhola ehyo."

Wambeba gaŋwaŋo nga aheja Wambusi nga amuloma ehiitu cehyene ehyalomire Wadwaaya. Wambusi gagobolamo ati, "Ebyo bibyo. Ese mbula aŋa mutego gupambiraho."

Wambeba sigademba. Gatiina ewa Waŋombe nga amuloma cehyene.

Waŋombe gabbuha ati, "Ese sindya nyama. Ndya nyaasi n'olwehyo mbula aŋa mutego ogwo guna hanjolereho. Pwere aŋo!"

Wambeba gageme aŋaatu ŋaŋe munju mu hisuli gaŋoleera. Waali oheja omutego nga gubbaliha. Mu hubbaliha ohwo gwapapasa temu emba ate ekambwe. Yaali kolakima.

Maani omweene hutega mutego ganyanguha gaaje abone ehya papahiise.

Nigoolire esolo ekambwe nj'eyamusangalira. Etemu yamuluma efunda edatu era gaaba nataŋone. Gaafa!

Bino byosi byaliŋo Wambeba nalengereeye era nabona.

Nibahenire ohusiiha Maani, egulo ŋaaliŋo omukolo ogwohumwiisa emagombe. Ohuhola omukolo guno basala mbusi.

Nolw'ehyo batiina basitula Wambusi. Ko nibamuŋira ohumusala galanga, omuŋi w'amagesi, Wambeba amuyeede. Wambeba gageene, gamuhebulisa ebibono ebigahajala hulula. Gamuloma ati, "Wange tiina bulaŋi, ja ohene ogwo."

Wambusi gatiinanga alira ati, "Eŋe erabuse liita musiru." Omukolo ogwa goboyeho gwaali gwa hwohya hasanja.

Ogwo guholewa dwaya ya ngoho. Baŋamba Wadwaaya ohuja ohuhubba huhihoso ohwohya ahasanja. Wadwaaya galanga Wambeba adulume amuŋonie. Wambeba gegaaniye nahebulira ebi Wadwaaya gahaajala huby'omutego.

Wambeba galomire Wadwaaya ati, "Otahena gugwe gumulindirira. Ja ohene ogwo." Wadwaaya gatiinanga aŋoola eno pwaloma ati, "Natalegerwa gatiina ninago ebuhwe!"

Ohwabya olumbe nihwoolire, bajiira ŋombe kubanga nj'ehola omukolo gw'ohabya. Eŋombe niyalanga Wambeba yesi gahaajala nagaana ohuyeeda.

Eŋombe yatiinanga erira amaŋeŋe n'eroma yiiti, "Nataŋulira hulabulwa aŋulira hageso nihalomaloma."

Nalehanga bali hwabya n'ese niija ohubaganiraho ahagano hange hano.