Agho olwatuuka, yabaayo embuzi eyayetebwanga Igodhoobe. Wambuzi Igodhoobe yali Kyabazinga wa kyayiro kya ba wansolo ni ba wanhonhi. Yalinga mu bulamu bulungi.

Lwaali lunaku lulala, Wambuzi Igodhoobe yaayeta ba wansolo ni ba wanhonhi bonaboona mu kyayiro ku lwekobano.

"Mikwaano gyange, mbeese lwa kuba nafunie ekilooto," Igodhoobe Kyabazinga bwe yakoba.

Bonaboona ba wansolo ni ba wanhonhi baasiriikirira. Baaghulirisa Kyabazinga na bwegendereza.

"Naloose nga bangi abe ekika kyaife bafiire lwa kuba bazira mmere na maadhi!" Kyabazinga Igodhoobe bwe yakoba.

Ba wansolo ni ba wanhonhi bwe baaghulira ekilooto, beelaliikirira inho. "Kiki kye twidha okukola buti?" Puusi bwe yabuuza.

Wankoko ni Wambaati baaleeta ekiloghoozo. Era baakoba bati, "Buli mulala ku ife aleete emmere era agite mu kyagyi kya Kyabazinga."

Bonaboona ba wansolo baikirizagania ne ekiloghoozo kino.

Kyabazinga Igodhoobe yaakola eiteeka. Yaalagira ati, "Mufune emiguwa. Musibe buli oyo ataaleete mmere mu kyagyi kyange era mumuleete yendi."

Oluvainhuma lwa kino, kyali kiseera kya Igodhoobe okumalaku ekisandha kye ekya obwakyabazinga.

Bonaboona ba wansolo ni ba wanhonhi abo omumaka baakungaana baalonda Puusi okuba Kyabazinga omuyaaka.

Aye Wambuzi Igodhoobe yaaloba okwikiriza Puusi nti ni Kyabazinga. "Ndi Kyabazinga. Era ezira Kyabazinga wundi. Tisobola kwikiririza mu kisolo kindi," Wambuzi Igodhoobe bwe yakoba.

Kyabazinga omuyaaka yaalagira ebisolo bitwaale emmere mu kyagyi kya Kyabazinga omuyaaka. Aye Wambuzi Igodhoobe tiyatwaala mmere waire.

"Wambuzi Igodhoobe bwe yali Kyabazinga, ife twenatweena twamugondhera. Buti iye tayenda kugondhera Kyabazinga omuyaaka. Kiki kye tugya okumukola?" Wante ni Wankoko bwe baabuuza.

Ba wansolo ni ba wanhonhi bonaboona abo omumaka baali basungughavu.

"Iye aloghooza ati wandhaghulo inho ku ife," Ba wansolo ni ba wanhonhi bonaboona bwe baabuuza.

Wambwa yaakoba, "Namuyamba bwe yali Kyabazinga. Tinatendukanga bwire. Nga ntambula eno ne ere okumuyamba."

Wantaama yaakoba, "Nze naamugha ebyooya byange okubwika abaana be."

Wambiidhi yaakoba, "Iye bwe yali Kyabazinga, yakobera bakwaano ati nze ndya inho. Aye nze nalinga mu nnimiro ye nga nnima na ku iluula mu duuma na bulo bwe."

Wantaama yaabuuza, "Yakoba ki? Ati olya inho? Yali aloghooza ati aidha kuba Kyabazinga wa lubeerera?" Me Wantaama yaayongeraku ati, "Akitegeere ati takaali Kyabazinga buti. Tiidhi lwaki yeefula owe ekitalo."

Bonaboona ba wansolo baaseka era baikiriza bati Wambuzi Igodhoobe ali nookutwaala emmere mu kyagi kya Kyabazinga omuyaaka.

Puusi, Kyabazinga omuyaaka yaalagira Wambuzi Igodhoobe okwidha yaali.

Ba wansolo bwe baagya okutwaala Wambuzi Igodhoobe, iye yali atyaime ku ntebe nga na amagulu asazeeku. Wante yaatyaama kumpi ni Wambuzi Igodhoobe era yaamukobera Kyabazinga omuyaaka kya akobye.

"Tiidha kugya ya Puusi. Ezira Kyabazinga wundi okutoolaku Nze. Bwo ofuuka Kyabazinga, oba Kyabazinga buliidho," Wambuzi Igodhoobe bwe yairamu.

"Twidha kukusiba ne emiguwa era tukutwaale ye Kyabazinga omuyaaka," Wantaama ni iseekooko bwe baakoba.

Wante yaasiba Wambuzi Igodhoobe ku mukira gwe. Meeni yaaghaluza Igodhoobe okumutwaala ewa Kyabazinga. Wantaama, Wambaati, Iseekooko ni Wankoko baalenkaana nga Wante ekulubeesa Wambuzi Igodhoobe.

Bonaboona balenkaanira kulala bati, "Twaala embudyadya eye nkandya eno ewa Kyabazinga waife omuyaaka!"

Okuva no olwo, buli mbuzi eloba okuva mu kifo bwe esikulwa.

Eloghooza eti ogighaluza kugitwaala mu mbuga ya Kyabazinga.