Aya kolong ng'ikiliok ng'iarei alomito kang'aberu ta ng'ide kech lokitela epei.

Analomaru kang'ina, achadanakina ng'auyei kotere apeipeyanut ang'adakarin.

Ayakatar kechi ng'ibaren. Erichakinito, eyokiyete arai ateni a eboyor kech.

Ng'irwa ng'ulu, abu eron lotiapolon tokeikin akwap daang. Tong'op akiru ng'ilapio lukaalak nabo towon akwap daang.

Nakaneni, abu akamu tomonu dio kikar ibore daang tani ng'ibaren, totoaka nikaalan kotere.

Apotu ng'ikiliok luarei ng'ulu toloto achekwaar namoni akirikare. Ani eroko eng'oleng'oleete alokiding amoni, king'olikis kesi Ekori edaka ng'akui alokiding ng'ikito.

Kiyanakis dio totiakut eger lo epedoreta akiar Ekori ng'olo.

Abu epei tama, "Echumi a akwara." Napei ekearia akan ebala atorem, dio loche toting ng'esi akan kitukuruwo akichum. Tonyou tani akilienyar akan keng.

Dio lotete abala echum kimiekinia loche Ekori. Na aisikinia loche Ekori, abu loedongi todoka kidiama naten na ekitoe alo adaka Ekori toporokin lomosiring etiang'it kang'olo.

Napei ating'ia ng'esi emosiring a Ekori, tobul Ekori lokojokon tamatar kitikirak tikir! Tikir! Tikir! Topedio ng'esi ng'amon, ng'ikito, ng'ikipeteteio ta ng'ang'ololin.

Ani enang'i wache niaburunia ating'it, tochakun ekile ng'olo kibusokin kwap pus! Awanawanaara akwan keng areng ng'aakot nabo abolochaanara eleu keng.

Wadio akajokon keng! Torukao ichetwaan ng'esi eperi kaneni eriaba. Abu king'arak ng'esi yaa nawi keng kitedek.

Na anang'eta nawi, abu ekile ng'olo kisisau eger lo ewokitor ngesi Ekori. Anyoun akwar ng'ina topalik ekile ng'olo akirikare ng'itieng.