Kolong ang'orot, ayei ekabaran epei lo ayakar awi naapolon.

Anyaritae ekabaran ng'olo Lemuya. Ayakar ng'esi ng'ide ng'iarei: nisapat ka nipese.

Ana arakari ng'esi ekabaran, ayakasi ng'itung'a ng'iarei lu akokoyenete ng'iboro keng nabo tomurote nakware.

Apotu ng'akiro na akoko ng'iboro ka amurore torotokis apei kooyan. Apotu ng'akiro ng'una tokuruwosi ekabaran ng'olo tong'opiki ibore ni esubakini.

Abu ng'esi king'itana ng'itung'a luko gelagelae tanang apak na anyunia ng'esi erot lo akirumun ng'itung'a ng'ulu ekokoyete ka amurore ng'esi.

Nakaneni abu taanyu erot. Aponi tolimokinae atamar taanyu esum loa emun, kiwaak nibole ni epeditoe kwap keng wadiochichi.

Toinik ng'esi ibole ng'ini kidiama ekidor. Dio kidokdok esum itorunit napedot.

Ee, apotu robo ng'irwa lu tomwonemwon tanang alotung'a aluarei, ekapilan ka ekokolan.

Nakware, abu ekapilan king'areniu toloma tooma awi ekabaran kang'olo kisiak amuronot.

Wadio kona tonang'u ekokolan dang elosi idami cha wadio, itetemi alomari tooma nawi ng'ina. Kitetemik akitorun lokidor loapolon, kidokadokakin esum nakou, toriang'akin king'olia kidiama, kidokakin nabo esum nakong'u.

Neni jik, kirema aetoil alokitubuli, tokeri lokidor loapolon kiwopak jik erukudi.

Nyeyakara ng'asain nako kalalak. Abu ekapilan dae kipungar peyeni ni ekeri topud alotooma awi ng'ina kiwopak ekokolan. Kiyatak ekokolan ng'akukusitami atamar kori ekabaran iwapit ng'esi.

Kotere elii lo ekokolan kang'olo abu ekabaran tonyou an aju itetemi akiwapakin ekapilan. Nabo ewapit ekapilan ekokolan.

Apotu daang aluuni kiritaros tolakinos. Ekabaran nyanyuna ekapilan. Ekapilan dae nyeanyuna ekokolan, tobur kechi daang tong'opikinos.