Mondli na Mbali nye hɔn egya tse kurow kɛse mu. Nna wɔrohwɛ afɔfi da a ɔda hɔn enyim no. Nnyɛ dɛ nna skuul ama kwan bi na mbom wɔkɛserɛ hɔn nanabasia. Nanabasia no tse bɛn nsutae anaa baka kɛse bi ho.

Mondli na Mbali hɔ enyi gyee kɛsenara osiandɛ nna mber aso bio dɛ wɔkɛserɛ hɔn nanabasia. Anafua no a adze rebɛkye ma woetu kwan no, wɔfaa hɔn baage na wɔyɛɛ krado dɛ wobotu dɛm kwan tsentsen no akɔ ekuraase hɔ. Woenntum annda na mbom wɔkɛsaa anafua no nyinara faa afɔfi no ho.

Anapaatu no, wɔtsenaa hɔn egya ne hɛn no mu na wosii mu dɛ wɔrokɔ ekuraase hɔ. Wohun mbepɔw, mbowa nna nhanban. Wohun ahɛn na wɔtow ndwom. Afei ɔyɛɛ kakra no nna mbofra no abrɛbrɛ ntsi enyikom kaa hɔn na wɔdedae.

Hɔn egya nyaan Mondli na Mbali ber a wodur ekuraase hɔ no. Wohun hɔn nanabasia Nobuntu, dɛ ɔtsena mpa bi do wɔ dua bi ase.

Nobuntu maa hɔn akɔaba kɔr ne fie na ɔdze enyigye toow ndwom twaa no ho wɔ ne dan no mu. Ne nananom no hɔn enyi gyee na wɔdze akyɛdze a wɔdze fi kurowkɛse mu bae no maa no. Mondli kaa dɛ, "Dzi kan bue m'akyɛdze no do."  Mbali kaa dɛ, "Oho medze no odzi kan!"

Obuebue hɔn akyɛdze no do wiei no, Nobuntu hyiraa ne nananom no. Afei Mondi na Mbali puee abowano kedzii agor. Nobuntu na ne ba banyan no dzii ebusua no ho nkɔmbɔ kyɛree na wɔtsee nsɛm.

Wimu yɛɛ sum no Mondli na Mbali sanee baa fie bedzii hɔn ewimber edziban. Ansaana wobowie hɔn edziban no nna wɔrededa! Adzekyee no mbofra no hɔn egya sanee tuu hɛn kɔr kurowkɛse mu na ɔdaan mbofra no gyaa Nobuntu.

Mondli na Mbali boa hɔn nanbasia wɔ fie adzeyɛ mu. Wobubuu nsu na wɔkɔhwehwɛɛ nyena. Wɔtasee nkyirefuwa fii nkokɔ no ase na wɔ tsetseew ebunebun fii hɔn haban mu.

Anapa da kor bi, Mondli faa ne nanabasia ne anantwi kɔr sar do dɛ wonkɔwe mfuw. Wɔkɔr obi fofor bi ne haban mu. Okuafo no bo fuwii. Ɔyɛɛ dɛ onnkegyaa anantwi no osiandɛ wawewe no ndɔbaa. Ofi dɛm da no, Mondli hwɛɛ dɛ anantwi no nnkɛsɛɛ obi be biribi bio.

Da fofor bi so, mbofra no nye Nobuntu kɔr gua mu. Nna ɔwɔ fiadze bi a ɔtɔn atɔsodze, esikyire na semina. Nna Mbali pɛ dɛ ɔka ndzɛmba no abo kyerɛ atɔfo. Mondli dze nna ɔkyekyer ndzɛmba a atɔfo no atɔ ma hɔn.

Annkyɛr na hɔn ahomgyeda no baa ewiei. Nna ɔwɔ dɛ mbofra no san kɔ skuul wɔ kurow kɛse mu bio. Nobuntu maa Mondli kyɛw na ɔmaa Mbali so ahatado. Osiesiee edziban maa hɔn dɛ wɛmfa ntu hɛn kwan no nkɔ.

Hɔn egya bae dɛ ɔrebɛfa hɔn akɛ no, nna wɔmmpɛ dɛ wɔbɔkɔ. Mbofra no serɛɛ dɛ nkyɛ Nobuntu nye hɔn bɔkɔ kurow kɛse mu. Ɔserewee na ɔkaa dɛ, "Mayɛ aberwa dodow dɛ mobɔkɔ kurɔw kɛse mu, na mbom mobɔtweɔn hom wɔ ha sɛ hom ba bio."