Mber tsentsen bi a abɛsen kɔ no, wɔ ekuraase bi a wɔfrɛ no Nyamani mu no, hɔ na barimba bi a wɔfrɛ no Kiundu tse. Ɔpɛ edziban dodow, nkanka nantwinam.

Da kor bi ekuraase hɔ ɔhen no too nsa frɛɛ ekuraasefo no nyinara baa ne babanyin n'ayeforhyia ase.

Kiundu so tsee dɛ nkorɔfo rekeka ayeforhyia fofor bi so wɔ ekuraase bi a wɔfrɛ hɔ Katumbi a ɔbɛn n'ekuraase hɔ. Kiundu susuii wɔ ne tsir mu dɛ, "Aponto ebien wɔ da kor noara mu!"

Kiundu kaa kyerɛɛ noho dɛ, "Ɔwɔ dɛ mokɔ dɛm aponto ebien nyinara ase."  "Mibedzi kan anantsew akɔ Katumbi na masan aba Nyamani."

Kiundu soɛɛr anapaatu na ɔnantsewee kɔr Katumbi ekuraase. Odur hɔ no ohun hɔn a wɔreyɛ edziban no dɛ wogudo reyeyɛ edziban. Kiundu kaa dɛ, "Mebɛsan akɔ Nyamani na masan aba ha ekyir yi."

Kiundu sanee nantsewee kɔr Nyamani a n'enyi da do dɛ obodu hɔ no na nantwinam no ayɛ krado. Afei na ɔkɔm dze no. Na odur hɔ no, nna nkorɔfo no daho ara reyeyɛ edziban no.

Ɔdwenee wɔ ne tsir mu dɛ, "Mifii Katumbi no nna wɔrehyɛ edziban noa no ase." "Sisei yi dze edziban no aben." Ntsi Kiundu sanee nantsewee kɔr Katumbi. Afei dze nna ɔkɔm dze no dodoodow.

Aber a Kiundu dur Katimbi no, nna nkorɔfo edzidzi ewie dadaw. Nna ahɔho dzedze akyɛdze rekyekyɛ ayefor na no kun no. Kiundu dze nna onnyi akyɛdze a ɔdze bɛkyɛ. Edziban ara nna ɔpɛ dɛ odzi.

Kiundu ne nsa sii famu wɔ edziban a oennya enndzi no. Ɔyɛɛ n'adwen dɛ ɔbɛsan anantsew akɔ Nyamani ekuraase hɔ. Nna ɔabrɛ na ɔkɔm so dze no ntsi ɔnantseew berɛww.

Okodur Nyamani ekuraase no, nna nkorɔfo rotow ndwom na wɔresaw so. Woedzi edzian no nyinara ewie!

Aber a ɔtsee dɛ edziban biara nnyi hɔ no, Kindu n'enyiwa do siww no. Nantwinam no abɔ no wɔ aponto ebien no nyinara ase. N'enyiwa do tsetsewee no, onyaa koko bi a ogu kɔɔpoo kakraba bi mu!

Kiundu dze kɔm da ho sanee nantsewee kɔr fie.