Mondli nee Mbali de bɛze anwo wɔ sua kpole zo. Ɛnee bɛnye la adenmalɛ ne azo. Tɛ kɛ bɛkpɔne sukulu na bɛkpondɛ kɛ bɛkɔ kpɔla bɛnla. Bɛnla de namule bie mɔɔ bikye nzule kpole bie la azo.

Mondli nee Mbali anye elie kpalɛ kɛ mekɛ edwu mɔ bɛkɔ bakpɔla bɛnla a. Nɔye ne mɔɔ aleɛ kye a bɛbahɔ la bɛ boɔboale bɛ ninyɛne mɔɔ bɛfa badu adenle ne la anloa. Bɛangola da na bɛlile adwɛleɛ bɛvanele adendule ne anwo nɔye ne kɔsooti.

Nwolomɔ mangye ne ala bɛze vale bɛ hɔle namule ne anu wɔ ye kale ne anu. Wɔ adendule ne anu bɛzeanle awuka, nane nee egyinli dɔɔnwo. Ngakula ne mɔ dianle ahale na bɛdole edwɛne. Yeangyɛ biala ɛvɛlɛ hanle bɛ na bɛlale.

Bɛze dunwɛle Mondli nee Mbali kɛ bɛdwu namule ne anu. Bɛnwunle bɛnla mɔɔ bɛfɛlɛye ↄmↄ Nobuntu kɛ ɔla ɛkpa zo wɔ baka ne abo.

Ɔmɔ Nobuntu vale edwɛne nee agolezilɛ liele bɛ gyɛlɛnye wɔ ye sua nu. Ye nɔnrane mɔ anye liele kε bɛvale ahyɛlɛdeɛ bɛrɛlɛle ye a. "Dumua buke me deɛ ne azo," Mondli zele ɔnla. "Kyɛkyɛ dumua buke me deɛ ne azo," Mbali zele ɔnla.

Ɔmɔ Nobuntu bukɛle ahyɛlɛdeɛ ne mɛ azo wiɛle la, ɔyiale ye nɔnrane ne mɔ. Mondli nee Mbali vindɛle hɔlile nrɔhoa. Nobuntu nee ɔra nrenya ne lile adwɛleɛ vanele abusua ne anwo.

Mekɛ mɔɔ maanu donle la Mondli nee Mbali rale sua nu ralile aleɛ. Wɔ aleɛlilɛ ne anu bɛvale nu bɛlale! Aleɛhyenle la, ngakula ne mɔ bɛ ze zale hↄle suakpole zo gyakyile ngakula ne mɔ manle Nobuntu.

Mondli nee Mbali boale bɛnla wɔ sua nu niyɛne yɛlɛ nu. Bɛhɔzale nzule eza noko bɛhɔ pepɛle ɛyɛne. Bɛ sesale ngɔkɔlɛ ne mɔ ahulonvia ne na eza bɛtetele kontomile wɔ tola ne anu.

Kenle ko nwonlomɔ, Mondli vale ɔnla nankɛ ne mɔ ɔhɔle adidi. Bɛ hɔdɔle awie ɛya nu. Ɛyazovolɛ ne vale ɛya. Ɔhanle ye anyebololεzo kɛ ɔfa ɔsa yeado nankɛ ne mɔ azo ɔluakɛ bɛli ye ɛya nu aleɛ ne mɔ. Ɔvi kenle zɔhane azo, Mondli bɔle ati anu kpɔkɛ kɛ zɔhane deɛne ɛnrɛzi biako.

Kenle ko, ngakula ne mɔ nee bɛnla hɔle gua nu. Bɛnla lɛ efiade mɔɔ ɔtɔne debie le kɛ daza, tomandese, ndɔlɔra nee bɛ ɛsaso. Eza ɔtɔne samila, asikyɛlɛ. Mbali bɔ ninyɛne ne awulɛ kile tɔvolɛma ne mɔ. Mondli noko boɔboa ninyɛne ne mɔɔ tɔvolɛma ne mɔ ɛdɔ la anloa ma bɛ.

Ademanlɛ ne ɛra awieleɛ. Ngakula ne mɔ bahɔ sukulu wɔ sua kpolɛzo. Nobuntu manle Mondli kyɛlɛ, ɔmanle Mbali noko ɛyɛlɛ tɛladeɛ. Ɔboɔboale aleɛ dɔɔnwo anloa ɔmanle bɛhɔle.

Mekɛ mɔɔ bɛze rale kɛ ɔbava bɛ la, bɛangulo kɛ bɛkɛhɔ. Ngakula ne mɔ bodole Nobuntu kɛ ɔne bɛhɔ suakpolɛzo. Ɔzelele ɔnzo abo na ɔhanle kɛ, "Sua kpolɛzo bɛndɛnla ye mgbanyima. Na ɔzele bɛ kɛ me wɔ ke mekendɛ bɛ ademanlɛ biako."