Sowa kɛ Laye kɛ amɛ tsɛ ataa hi shi yɛ maŋ ko mli. Amɛkpa gbɛ akɛ aha skul gbɛ koni amɛyasara amɛ naa. Ehi akrowa ko ni bɛŋkɛ kpaakpo agbo ko he.

Sowa kɛ Laye miishɛ amɛhe ejaakɛ be eshɛ kɛha amɛnaa saramɔ ekoŋŋ. Gbɛkɛ dani je baatsɛre kɛha amɛgbɛfaa lɛ, amɛto amɛ nibii fɛɛ kɛwo amɛ bagii amli ni amɛsaa amɛhe kɛha gbɛfaa kakadaŋŋ lɛ. Nakai gbɛkɛ lɛ, amɛ wɔɔɔ. Amɛgba gbijurɔ lɛ he sane aahu.

Be ni jetsɛre leebi maŋkpa lɛ, amɛshi kɛtee akrowa lɛ mli kɛ amɛtsɛ ataa tsɔne lɛ. Be ni amɛyaa yɛ gbɛjegbɛ lɛ nɔ lɛ, amɛtsɔne lɛho gɔji, kooloi kɛ ŋmɔji komɛi ahe. Amɛkane tsɔji ni amɛla lalai. Be saŋŋ sɛɛ lɛ, etɔ gbekɛbii lɛ hewɔ lɛ amɛkamɔshi ni amɛwɔ yɛ tsɔne lɛ mli.

Tsɛ ataa tsiɛ Sowa kɛ Laye be ni amɛshɛ akrowa lɛ mli lɛ. Amɛna amɛnaa, Naa Momo ka saa ko nɔ yɛ tso ko shishi ni eejɔɔ ehe.

Naa Momo kɛ lala kɛ joo nya amɛhe kɛbote shia lɛ mli. Enabii lɛ kɛ miishɛɛ ha lɛ nikee nibii ni amɛkɛba lɛ. "Gbelemɔ minikee lɛ naa klɛŋklɛŋ," Sowa kɛɛ. "Dabi, minɔ lɛ klɛŋklɛŋ," Laye kɛɛ.

Be ni Naa Momo gbele nibii lɛ anaa lɛ, ejɔɔ enabii lɛ. Kɛkɛ ni Sowa kɛ Laye jekpo kɛtee agbo lɛ naa amɛyashwɛ. Naa Momo kɛ ebinuu lɛ gba amɛweku lɛ he sane kɛ jeŋ saji komɛi ahe sane.

Be ni duŋ wo lɛ, Sowa kɛ Laye ku amɛsɛɛ kɛtee shia lɛ mli ni amɛyaye gbɛkɛ niyenii. Amɛgbeee niyeli lɛ naa ni wɔnyɔmɔ amɛ nɔ! Ni je tsɛre lɛ, gbekɛbii lɛ atsɛ ataa shi amɛ yɛ Naa Momo ŋɔ ni etee maŋ wulu lɛ mli.

Sowa kɛ Laye ye bua amɛ naa kɛ shia nitsumɔ. Amɛfo nu ni amɛ lɛ lai. Amɛya kɔlɔ wɔji yɛ wuɔi lɛ ashishi ni amɛtserɛ yelibai yɛ abɔɔ lɛ mli.

Leebi ko lɛ, Sowa kɛ enaa tsina yei lɛ tee jwɛikpemɔ. Amɛjo foi kɛtee ŋmɔ ko ni bɛŋkɛ amɛ mli. Okwaafonyo lɛ mli fu. Eto eyiŋ akɛ ebaatsi tsinai lɛ anaa ejaakɛ amɛye eŋmɔshi nibii lɛ. Kɛjɛ nakai gbi lɛ, Sowa bɔɔ mɔdeŋ akɛ tsinai lɛ yataooo sane kɛbaaa dɔŋŋ.

Gbi kroko lɛ, Naa Momo kɛ gbekɛbii lɛ tee jara lɛ nɔ. Eyɛ agba ko ni ehɔɔ yelibai, sikli kɛ samala yɛ mli. Laye sumɔɔ ni etsɔɔ nihelɔi lɛ nibii lɛ ajara. Sowa baato nibii ni nihelɔi lɛ he lɛ kɛhaa amɛ.

Gbɛhamɔ be lɛ eba naagbee. Esa ni gbekɛbii lɛ aku amɛsɛɛ kɛya skul yɛ maŋ wulu lɛ mli. Naa Mono ha Sowa fai ni eha Laye Suwɛta. Eto niyenii kɛha amɛgbɛfaa lɛ.

Be ni amɛtsɛ ataa ba amɛwolemɔ lɛ, amɛ sumɔɔ ni amɛyaa. Gbekɛbii lɛ kpa Naa Momo fai koni efata amɛhe kɛya maŋ wulu lɛ mli. Eŋmɔ mugɛɛ ni ekɛɛ, "Migbɔ fe maŋ wulu mli shihilɛ. Mamɛ nyɛ yɛ biɛ koni wɔsɛɛ skul gbɛhamɔ lɛ hu nyɛbasara mi."