Hey TigerMan, want to play?

Be ko in eho jeeŋmɔ lɛ, nuu ko ni atsɛɔ lɛ Saki hi shi yɛ Kweimaŋ. Eyeɔ ŋmaa naakpa. Esumɔɔ milɛ loo titri.

Gbi ko lɛ, akrowa lɛ mli maŋtsɛ lɛ fɔ nine kɛtsɛ akrowa lɛ mli bii lɛ fɛɛ kɛba ebinuu lɛ yookpeemɔ.

Saki nu ni mɛi komɛi miiwie akɛ ayɛ yookpeemɔ paati kroko ko hu yɛ akrowa nitsa amɛ nɔ ni atsɛɔ lɛ Adomaŋ lɛ. "Paatii enyɔ yɛ gbi kome nɔ!" Saki jwɛŋ he.

"Esani maya enyɔ lɛ fɛɛ," Saki kɛɛ ehe. Klɛŋklɛŋ lɛ, manyiɛ kɛya Adomaŋ kɛkɛ lɛ miku misɛɛ kɛba Kweimaŋ.

Saki te shi leebi maŋkpa ni enyiɛ kɛtee Adomaŋ akroma lɛ mli. Be ni eshɛ jɛmɛ lɛ, ena akɛ nihoolɔi lɛ miihoo niyenii lɛ lolo. "Maku misɛɛ kɛya Kweimaŋ ni maba be kroko," Saki fee eyiŋ.

Saki nyiɛ kɛtee Kweimaŋ ekoŋŋ belɛ eekpa gbɛ akɛ milɛ loo lɛ baabe. Agbɛnɛ hɔmɔ miiye lɛ. Shi be ni eshɛ jɛmɛ lɛ, jɛmɛ nihoolɔi lɛ hu miihoo niyenii lɛ loloolo.

Ekɛɛ yɛ eyiŋ akɛ, "Be ni mishi Adomaŋ lɛ amɛmiije niyenii lɛ hoomɔ lɛ shishi. Be nɛɛ lɛ ebe." Hewɔ lɛ, Saki nyiɛ ekoŋŋ kɛtee Adomaŋ. Agbɛnɛ, hɔmɔ miiye lɛ jeee shwɛmɔ.

Be ni Saki shɛ Adomaŋ lɛ gbɔmɛi lɛ eye niyenii lɛ momo. Gbɔi lɛ miike ayɛmfro kɛ ayɛmfrowu lɛ nibii. Saki bɛ nikee ko. Niyenii pɛ etaoɔ ni eye.

Edɔ Saki jogbaŋŋ akɛ aye niyenii lɛ ashi lɛ. Efee eyiŋ akɛ ebaaku esɛɛ kɛya Kweimaŋ akrowa lɛ mli ekoŋŋ. Akɛni etɔ lɛ ni hɔmɔ hu miiye lɛ hewɔ lɛ, enyiɛ blɛoo.

Be ni eshɛ Kweimaŋ akrowa lɛ mli lɛ, gbɔmɛi lɛ miila ni aajo. Amɛye niyenii lɛ fɛɛ momo!

Be ni Saki nu akɛ niyenii bɛ lɛ, nɔ nyɔ enɔ. Enaaa loo yɛ paatii enyɔ lɛ fɛɛ. Be ni ehiɛtsɛ lɛ, aha lɛ akasa yɛ kɔɔpoo bibioo ko mli.

Saki nyiɛ kɛtee shia ekoŋŋ kɛ hɔmɔ.