Mondli de Mbali de ba kwo mo zoori teo-fɔrɔ ne. Ba ni ba lage seo maŋa. Ko dage we bá lage se sikuuli mo pe, se bá lage se bá vu bá nunakwi tei mo. O zoori tio-balaŋa na twe dam-buga kamunu kadwoŋi nito mo.

Mondli de Mbali wo dam pwoli maŋa kam na yia se ba vu ba nunakwi jeiga to. Bá lage bá zola bá ke tampɔrɔ wone titine mo ye bá ti bá yiga se bá vu chow-dedɔrɔ o teo kom ne. Ba wó wane bá dɔ. Bá ŋɔɔne seo maŋa kam taane mo bá poori tiga.

Tiga na ba twɛ poorem to, bá nuŋi de bá kwo lɔɔre mo ba maa vei tio-balaŋa kam ne. Bá chwogi bá gaali pweero, vara de kari mo. Bá gare lɔɔra ye bá leena. Kɔ na ba daane to bia bam laam bugi ye ba to dɔɔne ne.

Bá kwo zaŋe Mondli de Mbali ba na maa twɛ teo-balaŋa kam to. Bá yi bá nunakwi, Nobuntu na jei sara wone teo kuri ne o sia to tei.

Nabuntu zaane ba o dare o sae ye o leena o kaage diga kam de wopwolo. O naaro tem wo pwoli se bá pa-o pɛɛra yalo bá na jaane ba nuŋi tio-fɔrɔ kom ne to. "Bobo n puri amo pɛɛre dem," Mondli na taga. "Awoo puri amo nyem dem yiga!" Mbali na taga.

O na puri pɛɛra yam to, Nobuntu pɛ o naaro tem swolim mo. Mondli de Mbali nuŋi pwoone se bá kwɛɛre. Nobunto de o bu zo sɔŋɔ lara mo bá daane pa se ko ba ko yi labara pam maŋa.

Wɛ na zwori to Mondli de Mbali jwoori sɔŋɔ mo se bá di titi wodiu. Bá na beene bá di bá ti to dɔɔne jaane bá. Tiga na poori to bá kwo jwoori tio-fɛrɔ kom mo odaare bá de Nobuntu.

Mondli de Mbali zeine bá nunakwi de sɔŋɔ totoŋa. Ba mɔɔne na ye ba dare ba beere dɛ mo bá pae bá nunakwi. Bá pɛ cheeni chechara bá pae ba nunakwi ye ba beere dwo-vɔɔro bá pa o.

Tetente dedoa mo Mondli jaane o nunakwi naane o vu gao se de di. De maa duri de zo nɔɔno kara. Valo wom bane ma zaŋe dede, o maa fuge bu wom o we o da ba pa naane dem de na di o wonno tam to ŋwaane. Ko zege dɛ dem konto ne Mondli da wó pɛ naane dem ja taane de ba.

Dɛ dedwoŋe ne mo bia bam tɔge de Nobuntu ba vu yaga. O jege pwoŋa mo o yeiga dwo-vɔɔro sikili de chamfene. Mbali lage se o taa tɛ zola yam sabia mo o pae yeigena bam. Mondli maa ke zola yalo yeigena bam na yeige to o ke daane o pae ba.

Amaa ba seo da yam ti. Bia bam jege se ba jwoori sikuuli mo tio-fɔrɔ kom ne. Nobuntu maa pa Mondli yu-puga o dare o pa Mbali waaro gɔrɔ. O maa ta la wodiu o pa bia bam se bá jwoori sɔŋɔ.

Bá kwo na tu se o kwei bá to, bá ba lage se ba vu. Bia bam maa lwoori Nobuntu se o tɔge ba o vu teo-fɔrɔ kom ne. O maa mɔne ye o we, "Amo kwe mo dedɛ. A ba wane a vu tio-fɔrɔ kom ne. Amaa a wó taa cheige abam ywo se á jwoori á seo maŋa daa na yia."