Mondli nɛ Mbali nɛ bumo tuto e wɔ bumo be kade to. Saŋɛ kikɛ baa keni bumo be aya be keto ekpa nna.

Manɛ b ka maaŋ naaŋ yɔ sukuu so so nɛ baa keni aya be keto na ekpa, ama ŋkpal b ka beeŋ ya bɔɔ bumo nanache so loŋ be saŋɛ na so so. Bumo nanache na daa wɔ kadebi ko nɛ k mata lɔr gboŋ nna.

Mondli nɛ Mbali be ŋgbene daŋ fuli bumo nna ga ŋkpal saŋɛ ka fo nɛ b naaŋ ya bɔɔ bumo nanache so so. Kanyɛ nɛ baaŋ klade n yɔ bumo nanache be kade to na nɛ b bela bumo be asɔ n yili.

B daŋ maŋ di loŋ be kanyɛ na, b baaŋ malga bumo be ewushi na be asheŋ nna kanyɛ na kikɛ.

Karɛ ka cha chipurdidi nɛ b luri bumo tuto be lori to m pɛ kade na be ekpa. B daŋ far n choŋ abee nɛ asɔbɔya nɛ ndɔ damata ana so nna.

B daa karga elori nɛ baa choŋ so nɛ amo nɛ baa shɛr to nna nsaa boŋ nshɛ. Ama k maŋ chɛr ko nɛ kegbeŋ pɛ mbia na nɛ b fara a di.

B ka fo kade na nɛ Mondli nɛ Mbali bumo tuto tiŋi bumo.

Nɛ b wu bumo nanache Nobuntu nɛ e dese klaŋ so ashi kadibi be kifito.

Ndoŋ nna nɛ Nobuntu wora bumo mraaba ŋ keta bumo n luri mbe lan to nseŋ fara a cha a kulti ebu to a boŋ nshɛ kagbenefuliso.

Mo nanabiana na be ŋgbene daŋ fuli bumo nna ŋkpal b ka bar mo kadegboŋ to be ŋkɛ so. Ndoŋ nna nɛ Mondli yɛ, "Bugi ma kakɛ so pɔɛŋ." Nɛ Mbali yɛ, "M-m, bugi meya so sososo."

Nobuntu ka bugi ŋkɛ na so n loge nɛ e nɛfa mo nanabiana na. Kumo be kaman nɛ Mondli nɛ Mbali lar kowu n ya kaa pɛl.

Nɛ Nobuntu nɛ mo pibi bir bumo be kanaŋ be asheŋ be bare nseŋ sa abar baru nɛ a wɔtɔ kikɛ nyam.

Kakpa ka bee brito nɛ Mondli nɛ Mbali bɛta m ba lan to nɛ b baa ji kanyɛso be ajibi. B maŋ ji n loge gba nseŋ fara a di!

Kumo be ŋklade nɛ bumo tuto far mbe lori m bɛta n yɔ kadegboŋ to ŋ ka mbia na nɛ bumo nana Nobuntu nawule.

Ndoŋ nna nɛ Mondli nɛ Mbali fara a chɛ bumo nana to a shuŋ mbe lan to be ashuŋ. B daa yɔ ebonto nɛ ndibi to nna.

B daa nite a fin ŋkoshi be afule nsaa wora epofantaŋ ashi mbe kudɔbi to a ba lan to gba.

Kacha ko nɛ Mondli yɛr mo nana be ana keji to. Nɛ ana na ya luri esa ko be ndɔto.

Nɛ edɔpo na nyaagboo ga nseŋ kaŋɛ fanɛ e beeŋ chɛ ana na m muni ŋkpal b ka ji mbe adɔjibi so. Yili kamɔncha Mondli maŋ naŋ shin nɛ ana na luri asheŋ to kikɛ.

Kacha ko nɛ mbia na nɛ bumo nana Nobuntu yɔ kebɛ to. E daa kɔ sutɔɔ nna a fa eposɔ nɛ shikiri nɛ kɔya.

Mbali daa sha kebaa kaŋɛ betɔpo asɔ na be yawu nna. Mondli malɛ e daa bela asɔ nɛ basa tɔ a wɔtɔ asɔ to a sa bumo.

Naniere bumo be ewushi be nchɛ loge. Adaga fanɛ mbia na e bɛta n yɔ kadegboŋ to n ya kaa yɔ sukuu.

Ndoŋ nna nɛ bumo nana Nobuntu sa Mondli kuwuro nseŋ sa Mbali malɛ awo to be kale. Kumo be kaman nɛ e bela bumo be ekpa to be ajibi ase n sa bumo.

Mbia na bumo tuton ka ba nɛ e ba a bumo, b daa maŋ naa sha keyɔ. Ndoŋ nna nɛ b kule bumo nana fanɛ e tu bumo n yɔ kadegboŋ to.

Nɛ e mushe nseŋ kaŋɛ, "M bel ga nɛ k naaŋ ya chena kadegboŋ to, amoso meeŋ baa jo menyi nfe nɛ men ba kaa bɔɔ ma so men be aya be keto kikɛ."