Saŋ saŋ kaŋa naŋ pare, dɔɔ kaŋa yuori naŋ di Kiundu da be la tembile kaŋa ba naŋ boɔlɔ Nyamani. A dɔɔ da nɔŋɛɛ bondirii yaga. O da nɔŋ la nɛne gaŋ bonzaa.
Daare kaŋa, a teŋa Naa da boɔle la a teŋa noba zaa o bidɔɔ pɔge deebo tigri zie.
Kiundu da la woŋee ka pɔge-de tigri kaŋa da la be la tembile kaŋ naŋ peɛle ka ba boɔlɔ be Katumbi. "Eee! Tige ayi bebi yeni poɔ." Kiundu la da zeŋ boora yɛlɛ.
"N na di la a tige ama zaa ayi. N na kyɛn gaa la Katumbi a te di a be sɛre kyɛ pãã leɛ wa Nyamani poɔ wa baare di o meŋ." Kiundu la da naŋ zeŋ boora yɛlɛ.
Kiundu da daŋ la iruu bebimaaroŋ a kyɛŋ gaa katumbi. O da te taɛ ka a bondimaaleba da naŋ ba e baare. Ka o da yeli, "N na leɛ gaa la Nyamani sɛre kyɛ pãa leɛ wa a kyɛ."
Kiundu pãa da la kyɛŋ la gbɛɛ gaa Nyamani. O teɛroŋ zaa da la ka o na te tarɛɛ be ka nɛne deɛ yɔrɛɛ zie zaa. Kɔŋ meŋ pãã da kpɛ o la yaga. Kyɛ o naŋ da te ta a be meŋ, ba meŋ da ba maale a bondirii baare.
"N naŋ da yire Katumbi, ba da naŋ maala la a bondirii, kaapɔge pampana eŋ, ba maale baarɛɛŋ." Kiundu la da teɛrɛ yɛlɛ. Azuiŋ, o da la iri la a kyɛŋ gaa Katumbi. A saŋa ŋa eŋ, kɔŋ da kpɛ o la te laare.
Saŋ na Kiundu naŋ da wa tara zaa ka a noba di la a bondirii zaa baare. A samba pãã da kora la a pɔgepaalaa ne a o serɛ kyɔɔtaare. Kiundu da ba taa kyɔɔtaa zaa na ko a kulitaa deme. Bondirii la ka o da boɔra na di.
O poɔ da saaɛ la ane o naŋ da ba pɔge a bondirii. O da da leɛ la o teɛroŋ zaa eŋ Nyamani. Kɔŋ ne baloo pãa da ba la bara o. O da kyɛnɛ la baaloŋ baaloŋ lɛ a gara a Nyamani.
O da wa te tara Nyamani, ka noba da yiele la yieluŋ a seɛrɛ. Ba da da di la a ba bondirii zaa bare.
O naŋ da wa wonŋ ka bondirii bare la, o da yieɛ la a le teŋɛ, a leɛrɛ kũu. O da ba nyɛ nɛne a tige ayi na zaa poɔ. O naŋ da wa iri, ba da de la kookoo ngmanlee poɔ a ko o.
Kiundu da leɛ gaa la o yiri ne kɔŋ.